АҚШ Москвадаги, Россия эса Вашингтондаги элчихонасини ёпиши мумкин, деди АҚШнинг Россиядаги элчиси Жон Салливан «ТАСС» агентлигига берган интервьюсида.
«Шундай эҳтимол бор, лекин мен бу катта хато бўлади, деб ҳисоблайман, — деди у тегишли саволга жавоб бериб.
Унинг сўзларига кўра, Вашингтон бундай қадамни ташламоқчи эмас, АҚШ маъмуриятида эса элчихоналарни ёпишни истайдиганлар деярли йўқ.
«АҚШ ўз элчихонасини ёпишга мажбур бўлишига ягона сабабни айта оламан: агар унинг фаолиятини давом эттириш хавфли бўлса, шундай бўлиши мумкин», — дея қўшимча қилди элчи.
Интервьюда Салливан элчихоналарнинг ишлашини икки томонлама алоқаларни сақлаб қолиш учун зарур деб атаган. Шу билан бирга, у Москванинг Вашингтон билан алоқаларини бутунлай узишини истисно қилди, чунки Россия ва Америка вакиллари БМТ Хавфсизлик Кенгашида мунтазам равишда учрашиб, бир-бири билан ёнма-ён ўтиради.
Элчи «дипломатик муносабатларнинг тўхтатилиши мумкинлигини кўрсатувчи» белгилар Россия расмийларидан билдирилаётганини бир неча бор таъкидлаган. Хусусан, у 26 февраль куни Хавфсизлик кенгаши раиси ўринбосари Дмитрий Медведев айтган сўзларни мисол қилиб келтирди, Медведов «санкция киритган мамлакатлар билан дипломатик алоқалар аслида принципиал жиҳатдан керак эмас» ва «элчихоналарга қулф осиш вақти келди» деган эди.