Юлдуз Усмонованинг эри шов-шувли «парда воқеаси» аслида қандай бўлгани ва концерт харажатларига ойдинлик киритди (видео)

Ўзбекистон халқ артисти Юлдуз Усмонова 2022 йил 10—25 март кунлари «Муҳаббат» деб номланган концерт дастурини тақдим этганди. Ушбу дастурда саҳна пардасида техник муаммо бўлгани сабабли хонанда ва томошабинлар орасида тушунмовчилик вазияти келиб чиққан эди.

Юлдуз Усмонова май ойининг сўнгги беш кунида 2022 йил ҳисобидан иккинчи маротаба концерт дастурини тақдим қилмоқда. Юлдуз Усмонованинг продюсери, турмуш ўртоғи Мансур Агалиев «Дарё» мухбири Феруз Муҳаммадга берган кичик интервьюсида 5 кунлик концертнинг харажатлари ҳамда парда воқеасининг аслида қандай бўлганига ойдинлик киритди.

Концертга кетаётган харажатни ҳисоблашга қийналиб қоламан. Менимча ушбу беш кунлик концерт учун 500 миллион сўмча харажат қилдик. Бу пулдан фойда кўзланмаяпти. Носталжини инсонларга эслатиб, зўр дастур қилсак, шунинг ўзи биз учун етарли бўлади. Барча янги концерт дастурларимизнинг сўнггида эски қўшиқларни кўп сўрашар эди. Шу фикрлар, талаблардан келиб чиқиб, ретро концерт қўйиш фикри келди.

Юқорида айтган харажатларимиздан ташқари, саҳнанинг муҳташам декорацияси, пардалари ҳамда залдаги ўтирғичларнинг ғилофлари тўлиқ ўзгаради. Бу ишни одатга айлантирганмиз, чунки ҳамма концертимизда ўзгача кайфият, янгилик бўлсин, одамлар «ўтган йили ҳам шу парда, декорация эди, бу йил ҳам худди ўшалар», демасин, учун бу нарсаларга ҳар йили, ҳамма дастурда алоҳида эътибор берамиз.

Ўтган йилларда қилинган барча пардалар, ўтирғичлар учун тайёрланган махсус ғилофларнинг барчаси омборхонада ётибди. Кимдир сўраса, «фойдаланаман», деса уни беришимиз мумкин.

Ушбу концертда 300 дан 360 кишигача ижодкор-у, техник ходимларгача меҳнат қиляпти. Деярли бир ойдан буён ҳар куни тушлик ўзимизнинг ҳисобимиздан бўлмоқда. Мисол учун, шу кунинг ўзида 25 кг гуруч дамлаб, ош олиб келдик. Бу ишлар, харажатлар ҳар куни такрорланади. Оркестрдаги бир ижодкор «Сизлар ҳали тушлик ҳам берасизларми?», деб ҳайрон бўлди. Ҳамма концертимизда бу ишларни одатга айлантирганмиз.

Саҳнага чиқаётган барча ижодкорлар учун бир хил рангда Туркиядан кийим буюртма бердим. Бу кийимлар ҳам етиб келди.

Мансур Агалиев, Юлдуз Усмонованинг продюсери, турмуш ўртоғи

Юлдуз опангиз у ерда нима бўлаётгани тушунмай қолган. Парда саҳнанинг ярмида тўхтаб қолди. Бир боламиз уни кўтараман, деб оёғи парда тутқичига кириб қолиб, кесилиб кетган. Бу нарсанинг расми ҳам бор. У нарсани ёпиб, ҳамма ўз иши билан бўлди. Шунақа вазият бўлиб қолди.

Эртанги кун «Юлдуз Усмонова сўкинди, ундай қилди, бундай қилди», деган хабарлар чиқди. Кўп одам аслида нима бўлганини билмасдан муносабат билдирди.

Мансур Агалиев, Юлдуз Усмонованинг продюсери, турмуш ўртоғи