Бухоро шаҳри мезбонлигида ўтган биринчи Халқаро зардўзлик ва заргарлик фестивалидан фоторепортаж

21—25 май кунлари Бухоро шаҳрида биринчи маротаба Халқаро зардўзлик ва заргарлик фестивали ўтказилди. Унда республиканинг барча ҳудудларидан 288 нафар ҳунарманд иштирок этди. Фестивалда халқ сайллари, дорбоз ва фольклор жамоалари томонидан эса турли дастурлар ташкил этилди. «Дарё» мухбири Севара Мирзараҳимова ушбу фестивалда қатнашиб, фоторепортаж тайёрлади.

Фестивалга 58 давлатдан юзлаб хорижий иштирокчилар ташриф буюрди. Улар орасида зардўзлар, заргарлар билан бир қаторда конференция иштирокчилари, фахрий меҳмонлар ҳамда хорижий оммавий ахборот воситаларини учратиш мумкин.

Фестивалда кашталари билан иштирок этган Мадина Қодирова 20 ёшидан бери шу соҳа ичида эканлигини айтади:

«Келин бўлиб тушганимда 18 ёшда эдим. 20 ёшимдан бошлаб қайнонамдан кашта тикишни ўргандим. Ҳозир бу ишни давом эттираётган учинчи авлод вакилиман. Фарзандларимга ҳам етти ёшидан бошлаб ўргатяпман. Каштадўзлик машаққатли меҳнат. Кичикроқ ёстиқлар учун каштани бир кунда тиксак, тўрт ойлаб, ҳатто бир йиллаб тикиладиган кашталаримиз ҳам бор.

Агар туристлар кўп бўлиб, савдо яхши бўлиб турса бир ойда 20 миллион сўмгача даромад кўрамиз. Лекин соф даромад эмас, чунки каштачиликнинг чиқими ҳам кўп», — дейди каштадўз.

Каштачи аёлнинг айтишича, улар Япония, АҚШ, Бразилия, Италия, Испания каби мамлакатларга доимий экспортни йўлга қўйган.

Қайд этиш жоиз, хорижлик заргарлар 15,5 килограмм оғирликдаги кумуш ва 6 килограммга тенг тилла тақинчоқлари билан фестивалда иштирок этди.

Халқаро зардўзлик ва заргарлик фестивали доирасида Bukhara Fashion days модалар оқшоми ҳам бўлиб ўтди. Унда маҳаллий ва хорижий дизайнерлар ҳамда ҳунармандлар иштирок этди.