Халқаро болалар куни арафасида Андижон шаҳар Фуқаролик ҳолати далолатномаларини ёзиш бўлими томонидан ота-онасининг эътиборсизлиги сабаб туғилиши қайд қилинмаган тўрт нафар болага туғилганлик ҳақида гувоҳномалар топширилди. Бу ҳақда «Дарё» мухбири Умиджон Мамарасулов хабар бермоқда.
Вилоят адлия бошқармаси ахборот хизматининг маълум қилишича, Ўзбекистон президентининг 2018 йил 12 июндаги «Фуқаролик ҳолати далолатномаларини қайд этиш тизимини янада такомиллаштириш чора-тадбирлари тўғрисида»ги қарори ижросини таъминлаш мақсадида ҳудудларда ташкил этилган ишчи гуруҳлар томонидан сайёр қабуллар ва уйма-уй юришлар давомида фуқаролик ҳолати далолатнома ёзувлари қайд этилган ёки этилмаганлик ҳолати ўрганилиб, муаммоларни ўз вақтида ҳал қилиш чоралари кўрилмоқда.
Қайд этилишича, 2022 йилнинг 5 ойи давомида ишчи гуруҳ томонидан аниқланган 15 нафар турли ёшдаги фуқароларнинг туғилганлиги суд қарорига асосан Андижон шаҳар ФҲДЁ бўлими томонидан қайд қилинган.
1 июнь – Халқаро болалар куни арафасида Андижон шаҳар ФҲДЁ ходимлари томонидан ака-сингиллар 2012 йилда туғилган Жавоҳир ҳамда 2013 йилда туғилган Муштарий Хажиевалар, 2012 йилда туғилган Ойшабиби Маликова ҳамда 2018 йилда туғилган Хуршидабону Раҳмоноваларга туғилганлик ҳақидаги гувоҳномалари топширилган.
«Қизимиз туғилганида турмуш ўртоғим Россияда ишлаётган эди. Бундан ташқари ўша вақтда қонуний никоҳимиз бўлмагани сабабли ўз вақтида туғилганлигини қайд этаолмаганмиз. Қолган ишга қор ёғади, дейишганидек ‘метрика’ олишимиз чўзилиб кетди. Ҳужжатсиз боғчага ҳам, мактабга ҳам жойлаштириш қийин бўлган. Гоҳида ўқитувчилари ҳужжатларини сўрашганида жавоб беришга қийналардик. Орадан ўн йил ўтган бўлсада туғилганлигини қайд этиб, гувоҳнома беришди. Бизга ёрдам қилган барчадан миннатдормиз», — дейди Ойшабибининг онаси Умидахон Ходжаева.
Изоҳ (0)