Наманган шаҳридаги Заҳириддин Муҳаммад Бобур номли маданият ва истироҳат боғи аттракционда содир бўлган ҳодиса видеоси ижтимоий тармоқларда тарқалди. «Дарё» мухбири Азизбек Абдувалиев ушбу воқеа тафсилотларини ўрганди.
Жорий йил 3 июнь куни мазкур боққа отаси билан келган бола аттракцион олдига бориб, уни ҳаракатлантиришга уринади ва кутилмаганда сирпаниб кетиб, йиқилиб тушади.
Боланинг отаси Маъруфжон Тўхтабоевнинг айтишича, фарзанди билан боққа келган пайти Наманган шаҳридаги мактабларнинг бирида 7-синфда ўқиётган ўғли унинг эътиборсизлиги туфайли аттракцион олдига бориб қолган ва ушбу ҳолат рўй берган.
14 яшар Муҳаммадали Маҳмудовнинг ҳозирда ҳолати қониқарли. Бола жароҳат олмаган, шу сабабли унинг оила аъзолари тиббиёт муассасаларига мурожаат қилмаган.
Наманган вилоят ИИБ матбуот хизмати раҳбари Шокиржон Ҳошимовнинг маълум қилишича, Наманган шаҳар ички ишлар органлари фаолиятини мувофиқлаштириш бошқармаси ва ФВБ вакиллари ҳодиса жойида ўрганиш ишларини олиб борган. Ҳолат юзасидан ҳужжатлар расмийлаштирилиб, суриштирув ҳаракатлари давом эттирилмоқда. Аттракцион фаолияти эса вақтинча тўхтатилган.
Изоҳ (0)