Ўзбекистонда 2022 йил 1 январдан харид чекларини «Солиқ» мобил дастури орқали рўйхатдан ўтказган жисмоний шахслар харид суммасидан 1 фоиз кэшбэкка эга бўлмоқда. Давлат солиқ қўмитасининг маълум қилишича, апрель ойи учун истеъмолчиларга тўланган кэшбэк 42,3 миллиард сўмга етган.
Қайд этилишича, 31 май куни апрель ойи учун истеъмолчиларга яна 3,7 миллиард сўм кэшбэк тўлаб берилган. Бу орқали истеъмолчиларга йил бошидан буён 115,9 миллиард сўм кэшбэк тўланган.
Шунингдек, шу куни:
- январь ойи учун 194,4 миллион сўм;
- февраль ойи учун 234,1 миллион сўм;
- март ойи учун 588,4 миллион сўм кэшбэк тўланди.
Тадбиркорлик субъектлари томонидан:
- солиқ ҳисоботлари топширилиши;
- ҳисоботлардаги камчиликлар тузатилиши;
- солиқ қарздорлиги камайтирилиши инобатга олиниб, қолган кэшбэк суммалари автоматик тарзда тўлаб борилади.
Харид чекини сканерлаган фуқароларга кэшбэк қайтариш амалиёти
2021 йилнинг октябрь ойида президентнинг назорат-касса техникасидан фойдаланишни такомиллаштиришга доир қарори қабул қилинганди. Ҳужжат билан 2022 йил 1 январдан бошлаб чакана савдо, умумий овқатланиш ва аҳолига маиший хизмат кўрсатиш объектларида харидни амалга оширган ҳамда ушбу харидни солиқ органларининг махсус мобил иловасида харид чекини QR-код ёрдамида сканерлаш орқали рўйхатдан ўтказган жисмоний шахсларга уларнинг банк карталарига ой якуни билан харид суммасининг 1 фоизи республика бюджетидан қайтарилади.
ДСҚ маълумотига кўра, эндиликда чекда МХИК коди тўғри кўрсатилган барча товарлар (хизматлар) учун кэшбэк тақдим этилади. Рад этиш тўлиқ харид суммасига (бутун чек учун) эмас, балки фақат маълумотлар базасида мавжуд бўлмаган МХИК коди кўрсатилган маҳсулот (товар ва хизмат)ларга нисбатан қўлланилади.
Изоҳ (0)