Қашқадарёдан Тошкентга истеъмолга яроқсиз гўшт маҳсулотларини олиб келаётган Cobalt автомобили аниқланди. Бу ҳақда ИИВ Жамоат хавфсизлиги департаменти хабар берди.
Маълум қилинишича, Кўкдала туманидаги «Умакай» ЙПХ масканида Cobalt автомобили назорат текшируви учун тўхтатилган. Қашқадарё—Тошкент йўналишида ҳаракатланиб келган чирчиқлик Д.А.га тегишли машина юкхонаси кўздан кечирилганда, тегишли ветеринария ҳужжатларисиз, келиб чиқиши номаълум бўлган 830 килограмм гўшт маҳсулоти борлиги аниқланган.
Ушбу гўшт маҳсулотларининг сифати ва яроқлилигини текшириш учун вилоят озиқ-овқат маҳсулотлари хавфсизлиги микробиология ва ветеринария-санитария экспертиза лабораториясига топширилган.
Аввалроқ Намангандан Тошкентга келиб чиқиши номаълум бўлган 239 кг мол ёғи аниқлангани, Қашқадарёда Lacetti юкхонасидан 160 кг истеъмолга яроқсиз гўшт топилгани, Сурхондарёдан Тошкентга 100 килодан ортиқ истеъмолга яроқсиз гўшт олиб кетаётган Cobalt тўхтатиб қолингани тўғрисида хабар берилганди.
Изоҳ (0)