Бугун,

  • USD 10940.05
  • RUB 182.26
  • EUR 11121.65

Ўзбекистонда озиқ-овқат нархларининг қимматлашишига жаҳон бозоридаги нархлар ўсиши таъсир қилмоқда. Бу ҳақда 30 май куни АОКАда бўлиб ўтган матбуот анжуманида молия вазири ўринбосари Аҳаджон Ҳайдаров айтиб ўтди, дея хабар бермоқда «Дарё» мухбири.

Аҳаджон Ҳайдаров

Аҳаджон Ҳайдаров
Фото: «Дарё»

Аҳаджон Ҳайдаровнинг таъкидлашича, озиқ-овқат бозорида кескин ўсиш кузатилса, ҳукумат тегишли чоралар кўради.

«Озиқ-овқат нархининг ошиши фақат бизда эмас, бутун дунёда кузатиляпти. Ўзбекистон қобиққа ўралиб қолмаган. Биз бутун ҳамжамиятнинг аъзоси бўлганимиз учун маълум бир маҳсулотларни экспорт қиламиз, бошқаларини импорт қиламиз. Шу нуқтаи назардан, биз вазият оғирлашаётган бугунги пайтда иложи борича иш ҳақи миқдорини оширишга ҳаракат қилдик. Кўпчиликда ойликлар нима учун 12 фоизга оширилгани тўғрисида савол туғилмоқда. Ўтган йили иш ҳақи ва бошқа тўловлар 10 фоизга оширилганди. Эндиликда эса инфляция даражаси 10-11 фоиз атрофида бўлмоқда. Шунинг учун инфляция даражасидан 1–2 фоиз кўпроқ оширдик. Эртага ҳақиқатан озиқ-овқат тенденцияси шу даражада кетадиган бўлса, ҳукумат минимал истеъмол харажатлари (МИХ) миқдорини қайта кўриб чиқади. Февраль ойида МИХ 440 минг сўм эди, ҳозир 500 минг сўмга чиқди. Бу нимани берди? Аввал йилнинг бошида ижтимоий нафақа олувчи оилалар сони 1 миллион 300 мингта эди. Ҳозир эса бу кўрсаткич 2 миллионга етди. Шу оилаларда яшовчи болалар сони 5 миллион нафарни ташкил этмоқда. Қорақалпоғистонни мисол келтирсак, ҳозир у ерда деярли ҳар учта оиладан биттаси ижтимоий нафақа олмоқда. Ҳукумат шу жумладан, Молия вазирлиги озиқ-овқат хавфсизлигини таъминлаш, нархлар ошишини аҳоли турмуш даражасига салбий таъсирининг олдини олиш юзасидан барча чораларни кўради», – деди вазирлик расмийси.

Аввалроқ президент Шавкат Мирзиёев май ойида республикадаги инфляция даражаси 1 фоизга ошгани, кўп ҳокимлар нарх-навога эътибор қилмай жиловни қўлидан чиқариб юборганини айтганди. Шунингдек, Қишлоқ хўжалиги вазирлиги Ўзбекистоннинг ўтган йилдаги дон захираси август ойигача етишини маълум қилганди.

Изоҳ
Асосий янгиликлар