Хоразм вилояти Урганч шаҳрида Lada ва Isuzu тўқнашуви оқибатида икки киши ҳалок бўлгани тўғрисида хабар берилганди. Вилоят ИИБ ҳолатга муносабат билдириб, ҳолат бўйича жинояти иши қўзғатилганини маълум қилди.
12 май куни соат 14:30 ларда Урганч шаҳрининг Ал-Хоразмий, Шерозий ва Ғафур Ғулом кўчалари туташган чорраҳада Isuzu автобуси ва Lada-2194 енгил автомашина иштирокида оғир оқибатли йўл-транспорт ҳодисаси содир бўлган.
Светофор орқали тартибга солинувчи ушбу чорраҳада содир бўлган йўл-транспорт ҳодисаси натижасида Isuzu автобуси ён томонга ағдарилиши оқибатида ундаги икки нафар йўловчи олган оғир тан жароҳатлари туфайли ҳодиса жойида вафот этган.
Шунингдек, авария оқибатида автобуснинг турли даражада тан жароҳати олган йўловчиларига тиббий ёрдам кўрсатилган.
Ҳолат юзасидан жиноят иши қўзғатилиб, тергов ҳаракатлари олиб борилмоқда.
Аввалроқ Тошкентда Spark бетон тўсиққа урилиши оқибатида ҳайдовчи ва йўловчи вафот этгани, Навоийда 25 нафар йўловчи бўлган автобус ағдарилиб кетгани, Андижонда Nexia-3 билан тўқнашган Tico иккига бўлиниб кетгани тўғрисида хабар берилганди.
Изоҳ (0)