Самарқанд, Қорақалпоғистон, Қашқадарё — бу 2022 йилнинг бошидан май ойининг 12 санасига қадар президент Шавкат Мирзиёев ташриф буюрган вилоятлар эди. Давлат раҳбари 12 май, пайшанба куни эрта тонгдан Фарғона томон йўл олди. Сафар давомида борилиши режалаштирилган жойлар кўп ва хилма-хил эди. Президент ташрифнинг илк кунидаёқ қишлоқ хўжалиги, ҳунармандчилик, тўқимачилик тармоқларидаги корхоналар фаолияти билан танишди, шунингдек, бунёдкорлик ишларини кўздан кечирди. Хўш, Шавкат Мирзиёевнинг Фарғонага ташрифининг биринчи куни қандай ўтди? «Дарё» мухбирлари воқеа жойидан репортаж тайёрлади.
Кенг ҳовлида жойлашган сўрилар олдидан ўтиб, кўзимиз ўймакор нақшларга тушди. Бизга маълум қилишларича, бу ерда миллий ҳунармандчилик йўналишида ёғоч ўймакорлиги мактаби ҳам ташкил этилган экан.
Шунингдек, эътиборимизни тортган асосий буюм — ҳашаматли айвон сўри бўлди.
Ушбу айвон сўри камида 70 миллион сўмга баҳоланар экан. Президент ташриф буюрган уста Муҳаммадалининг мактабида айнан шундай ишлар қилинмоқда. Қилинаётган ишлар ярим ёки бир йилда эмас, камида 4-5 йилда бунёд бўлади. Ушбу жараёнларни кўриб, билганимиз бизга бир сўзни айтишга ундади — сабр.
Ўзбекистон халқ устаси Муҳаммадали Юнусовнинг таъкидлашича, ушбу корхонага уюшмаган ёшлар кўпроқ жалб этилади. «Шуларни иш билан банд қиляпмиз, ишга ёндоштиряпмиз. Улар келган кундан даромадга киради, пулини олади. Устахонамизнинг ҳисобидан шуларга ойлигини чиқариб берамиз. 1-2 йил давомида ишласа, ойлигини ошириб олиши мумкин», — дейди уста.
Бориладиган объектлар кўп, вақт эса кам. Давлат раҳбари ушбу корхонадан чиқиб, навбатдаги манзилга йўл олди. Биз эса президент бориши режалаштирилган бошқа манзилга бориб, ушбу объект ҳақида маълумотлар тўплаб турдик.
Мавзуга доир: Шавкат Мирзиёев Қорақалпоғистон ва вилоятларда мебелбоп дарахтлар етиштириш бўйича кўрсатма берди
Президент Бувайда туманидан сўнг Учкўприкка келди, бу галги манзил — «Бобошбек» маҳалласидаги «Енгил саноат маҳсулотлари ишлаб чиқариш ва логистика маркази» эди.
Маълумот учун, мазкур ҳудудда 2 гектар майдонда 2 та логистика маркази ташаббускорлари томонидан амалга оширилади. Корхонанинг ишга туширилиши натижасида йилига 876 миллиард сўмлик маҳсулот ишлаб чиқарилади. Экспорт ҳажми 18,5 миллион долларни ташкил этади. Йилига бюджетга 106,5 миллиард сўм маблағ тушади.
Давлат раҳбари цехларда фаолият олиб борвётган хотин-қизлар билан ҳам мулоқот қилди. «Ҳар битта йўналишимиз эртанги кунга замин яратади. Тасаввур қилинглар, бир йилдан сўнг маҳсулотларингизни бозори чаққан бўлади. Сифат ўзгаради, талаб ўзгаради, бозори ҳам бўлади. Тайёр бозорга чиқиб сотиш мумкин бўлади», — дейди Шавкат Мирзиёев.
Давлат раҳбари шу ернинг ўзида ҳоким ёрдамчилари билан ҳам суҳбатда бўлиб, давлат хизматчилари ўзгариши кераклиги, ўзгармайдиган одамларга жой йўқлигини айтди.
«Ҳозир фалончининг ўғли, фалончининг жияни, деган гап йўқ. Барчамиз халқ хизматчисимиз. Яхши ишлаган одам ўз ўрнида кўпроқ қолади, рағбатлантирамиз. Яхши ишламаган одамни эса лавозимида олиб қолмаймиз. У халқ хизматчиси бўлмаса, ишламайди», — дейди давлат раҳбари.
Шавкат Мирзиёев бориши режа қилинган навбатдаги манзиллар ҳали кўп эди. Биз журналистлар гуруҳи давлат раҳбарининг ҳар бир ташрифини кенгроқ ёритиш мақсадида гуруҳларга бўлингандик. Гуруҳимиз билан бирга Тошлоқ туманидаги Агро Импех Valley МЧЖ томон йўл олдик.
Корхона эгаларининг айтишича, бу ерлар ҳақиқий тошлоқ жой бўлган. Тадбиркорга берилган имкониятлар сабаб режалар реал воқеликка айланган. Корхона раҳбари Шерзод Ботировнинг сўзларига кўра, бу ерда 70 та иш ўрни яратилган.
«Биз бу ишларимизнинг 90 фоиздан кўпроғини экспорт қила оламиз. 25 йиллаб тадбиркорлик қилдик. Роса қийналган кунларимиз бўлган. Сўнгги 5 йилда ҳеч ким текширгани келмади, аксинча нима ёрдам деб келишди», — дейди тадбиркор.
Президент 2020 йилда ишга туширилган, қиймати 100 миллиард сўмдан зиёд бўлган корхона билан яқиндан танишди. Бу ерда «Амира текстил» белгиси остида тайёр кийим–кечаклар ишлаб чиқарилмоқда. Шунингдек, ёзги пойабзалларнинг устки қисми ҳам тайёрланади.
Давлат раҳбари шу ерда Тошлоқ туманида ишлаб чиқарилаётган саноат ва ҳунармандчилик маҳсулотларини кўздан кечирди.
Шавкат Мирзиёевнинг Фарғона вилоятидаги илк куни шу ерда якунланди.
Изоҳ (0)