Prokuratura idoralari tomonidan madaniy merosning ko‘chmas mulk obyektlarida noqonuniy qurilmalarni bartaraf etish bo‘yicha o‘tkazgan nazorat tadbirlarida respublika bo‘yicha jami 108 ta madaniy meros obyektida 146 ta noqonuniy qurilma qurilgani aniqlandi. Bu haqda Bosh prokuratura matbuot xizmati xabar berdi.
Ta’kidlanishicha, ushbu tadbirlar natijasi bo‘yicha madaniy meros obyektlari hududida qurilgan 7 ta noqonuniy qurilmalar, jumladan, Surxondaryoda “Zartepa” (I-V asrlar), “Karvontushdi” (I-VI), “Ismoiltepa” (I-VIII) va “Manguzartepa” (I-IV), Qashqadaryoda “To‘rtko‘ltepa” (I-VI) arxeologiya obyekti, Xorazmda “Qibla tozabog‘” (XIX) arxitektura yodgorligi hududidagi noqonuniy qurilmalar buzdirildi.
Shuningdek, 71 ta obyektda qurilgan 76 ta noqonuniy qurilmani buzdirish yuzasidan mutasaddi idoralar tomonidan yozma ko‘rsatmalar berilishi ta’minlangan, 44 ta madaniy meros obyektidagi 63 ta noqonuniy qurilmalarni buzdirish yuzasidan sudlarga da’vo arizalari kiritilgan. Masalan, Termiz tumanida joylashgan “Manguzartepa” arxeologiya yodgorligi (I-IV asr) ustiga uyali aloqa operatori tomonidan noqonuniy o‘rnatilgan antenna qurilmalarini buzdirish bo‘yicha sudga da’vo arizasi kiritildi;
Bundan tashqari, noqonuniy qurilma qurgan 26 nafar shaxs ma’muriy javobgarlikka tortilgan.
Avvalroq Buxoroda qo‘yxonaga aylangani rad etilgan “Chor minor” madrasasi chorbog‘ida tandirdan ham foydalanib kelingani ma’lum bo‘lgani, Qoraqalpog‘istonda maqbara hududida qabr uchun yerlar sotilayotgani, Samarqandda “snos”ga tushgan hududdan topilgan Qur’on oyatlari tushirilgan qadimiy qabrtoshlar qaysi asrga va kimga tegishli ekani aniqlangani to‘g‘risida xabar berilgandi.
Izoh (0)