Самарқанд вилоятининг Ургут туманида пропан газ баллони ичига яширилган гиёҳвандлик моддаларини олиш вақтида портлаш содир бўлди, деб хабар беради вилояти ИИБ ахборот хизмати.
Маълум қилинишича, Душанбе ва Бохтар шаҳарларида яшовчи 44 ёшли Д.О. ҳамда С.С. пропан газ баллони ичига яширинча жойлаштирилган опий гиёҳвандлик моддасини Тожикистондан Ўзбекистонга олиб ўтган ва сотиш мақсадида Ургут туманида яшовчи таниши, 43 ёшли М.Ф.нинг яшаш хонадонига келган.
Улар пропан газ баллони ичидан гиёҳвандлик моддаларини олаётганида газ чақнаши оқибатида куйиб, туман шифохонасига олиб борилган.
Ўтказилган текширувлар натижасида пропан газ баллони ичида целлофан пакетга ўралган 244,19 грамм опий гиёҳвандлик воситаси борлиги аниқланиб, процессуал тартибда ҳужжатлаштирилган.
Шунингдек, Давлат хавфсизлик хизмати вилоят бошқармаси ҳамда вилоят ИИБ ходимлари билан ўтказилган яна бир тадбирда Иштихон туманида яшовчи, 40 ёшли Қ.А. бошқарувида бўлган Nexia-2 русумли автомашинада 1 килограмм 8,16 грамм опий гиёҳвандлик воситаси борлиги аниқланиб, далилий ашё сифатида ҳужжатлаштириб олинган.
Ҳозирда ушбу фуқароларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Тошкент вилоятида Тожикистондан кириб келган юк поезди тагига яширилган наркотик топилгани, ДХХ Сурхондарёда 23,5 кг гиёҳвандлик моддаларини мусодара қилгани, ДХХ Бухорода гиёҳванд моддани 2,5 минг долларга сотишга уринган Афғонистон фуқаросини ушлагани тўғрисида хабар берилганди.
Изоҳ (0)