Ижтимоий тармоқларда Фарғона вилояти Сўх туманига 11 май куни кучли сел келгани ҳақида хабар тарқалди. Фавқулодда вазиятлар вазирлиги ҳолат юзасидан маълумот берди.
Қайд этилишича, шу куни соат 18:00 да қисқа муддатда ёғиб ўтган кўп миқдордаги кучли ёғингарчилик оқибатида Фарғона вилояти Сўх туманининг «Сўх», Фарғона туманининг Шоҳимардон ҳудуди «Ёрдон» маҳаллаларида сел оқимлари юзага келган. Ҳодиса оқибатида Сўх туманининг Малбут қишлоғи ҳудудидан оқиб ўтувчи «Малбут», «Девайрон» МФЙ ҳудудидан оқиб ўтувчи «Девайрон» сел йўлларида сел оқимлари сой ўзанига сиғмай, Сўх—Риштон автомобиль йўлининг қатнов қисмига лойқа ва турли тоғ жинслари оқизиб келган. Шу туфайли ушбу автомобиль йўлида транспорт воситаларининг қатнови вақтинчалик тўхтатилган.
Сел сувлари Малбут қишлоғидаги хонадонларнинг ертўла, қўшимча бино ва томорқаларига кирган. Ҳозирда муҳандислик техникалари ёрдамида сел оқими оқибатларини бартараф этиш ишлари олиб борилмоқда.
«Сел оқими оқибатларини бартараф этиш, сув тошиб кирган хонадонлар сонини аниқлаш ишлари туман ҳокими раҳбарлигида Фавқулодда вазиятлар бўлими ва тегишли хизматлар томонидан амалга оширилмоқда», — дейилади хабарда.
Изоҳ (0)