Арт-карлар ҳақида гап кетганда биринчи навбатда BMW автомобиллари ёдга олинади, чунки марка бу каби машиналарни завод миқёсида ишлаб чиқаришни зиммасига олган. Аммо бу исталган автомобиль ишқибозига қандай машинага эгалик қилишидан қатъи назар ўз кучи билан транспорт воситасини арт-карга айлантиришга тўсқинлик қилмайди. Шу сабабли германиялик Ханна Шоневальд Porsche спорткаридан ўзининг ижодий лойиҳасида фойдаланди, деб хабар беради «Motor».
Оқ Porsche 964 Carrera 2 купеси нақшга эга бўлган бўлиб, муаллифнинг фикрича, бу немис спорткари шаклининг башанглигини ифода этиши керак.
Тасвирлар қўлда чизилган — аввалига кузовга суратнинг четлари белгилаб олинган, кейин эса Ханна мўйқалам ёрдамида бўёқни суриб чиққан.
«Санъат ва автомобилларга бўлган қизиқишимнинг уйғунлиги менга табиий кўринди. Кўпчилик арт-автомобиллар мавзуси аллақачон тугаган деб ўйлашлари мумкин, лекин мен дунё яна биттасига эга бўлиши керак дея ҳисобладим», — деб тушунтиради лойиҳа муаллифи.
Porsche 964 Carrera 2 ни бўяш ишлари бир нечта жойда амалга оширилган, чунки нақшларни тушириш билан бирга Porsche’нинг расмий аккаунтига видеоролик ҳам тасвирга олинган. Роликда Ханна Шоневальд қандай қилиб арт-кар ғоясига келгани ва спорткар кузовидаги чизиқлар нимани англатишини тушунтириб берган.
Эслатиб ўтамиз, 2020 йилда япониялик дизайнер Lamborghini Aventador S ни арт-объектга айлантирганди.
Мавзуга доир: Фото: Арт-объектга айлантирилган Mercedes-Benz G-Class
Изоҳ (0)