Япония Россия бош вазири, ДХР ва ЛХР раҳбарларига қарши санкциялар киритди

Украинадаги воқеалар муносабати билан Япония Россия, Донецк халқ республикаси (ДХР) ва Луганск халқ республикасидан (ЛХР) 141 кишига, жумладан, Россия бош вазири Михаил Мишустин, Россия Хавфсизлик кенгаши котиби ўринбосари Рашид Нургалиев ва тадбиркор Геннадий Тимченконинг яқинлари, шунингдек, Россиянинг 71 компаниясига қарши янги санкциялар киритмоқда. Янгиланган санкциялар рўйхати Япония ташқи ишлар вазирлиги сайтида эълон қилинди.

Дастлаб, Россия, ЛХР ва ДХРдан 133 кишига нисбатан санкция қўллангани хабар қилинганди. Тўлиқ рўйхатларга кўра, уларнинг умумий сони 141 киши — Россиядан саккиз нафар, ЛХР ва ДХРдан 133 нафарни ташкил этмоқда.

ЛХР ва ДХР учун рўйхатга республикалар раҳбарияти вакиллари, жумладан Руслан Дубовский ҳам киритилган. Японияда ушбу шахсларнинг активлари аниқланса, музлатилади. Бундан ташқари, ушбу шахслар билан молиявий операцияларни амалга ошириш, шу жумладан депозит ёки кредит шартномаларини тузиш тақиқланади.

Шунингдек, Россиянинг 71 компанияси учун товарлар ва операцияларни экспорт қилиш тақиқланади. Улар орасида, хусусан, «Алмаз-Антей», ВНИИ «ЭТАЛОН», «Интелтех» ва бошқалар бор. Бундан ташқари, рўйхатга «Тактик ракета қуроллари» корпорацияси, шунингдек, алоқага ихтисослашган илмий-тадқиқот институтлари ва техник бюролари киритилган.

Шу кунга қадар Япония Украинадаги уруш муносабати билан Россияга қарши бир неча санкциялар пакетини киритган. Хусусан, у Россияни энг қулай давлат савдо режимидан чиқариб ташлади ва Россияга 300 дан ортиқ товарлар, жумладан яримўтказгичлар, радарлар, сенсорлар, лазерлар ва бошқа жиҳозлар, шунингдек, қимматбаҳо автомобиллар ва ҳашаматли товарларни экспорт қилишни тақиқлади.

Шунингдек, Россиядан 38 турдаги товарлар — шпон, тахта, автомобиль ва мотоцикллар, пиво, вино, ароқ ва бошқаларни олиб киришни тақиқлади. Бундан ташқари, Россиянинг тўққизта йирик банкига нисбатан санкциялар жорий этилди.