Қисман тан олинган Жанубий Осетия республикаси президенти Анатолий Бибилов бу галги сайловларда ғалаба қозона олмади, деб ёзади «Интерфакс». 8 май куни бўлиб ўтган сайловнинг иккинчи турида Марказий сайлов комиссиясининг дастлабки маълумотларига кўра, «Нихас» сиёсий партияси етакчиси Алан Гаглоев ғалаба қозонган.
Баённомаларнинг 18 фоизи кўриб чиқилгач, Гаглоев 3686 (59,22 фоиз), Бибилов эса 2274 (37 фоиз) овоз олгани маълум бўлди.
Бибилов аллақачон мағлубиятини тан олган ва Гаглоевга омад тилаган.
Жанубий Осетияда президентлик сайловларининг биринчи тури 10 апрель куни бўлиб ўтганди.
Март ойи охирида Анатолий Бибилов Жанубий Осетия Россияга қўшилиш учун «қонуний чоралар» кўришини маълум қилганди. У буни президентлик сайловларидан сўнг амалга оширишга ваъда берган. Жанубий Осетия парламенти спикери Валерий Кварчия Бибиловнинг баёнотига жавобан, республика Конституциясида «мамлакат мустақил давлат дея аниқ қилиб белгиланганини» таъкидлади.
Дунёнинг аксарият давлатлари Жанубий Осетия мустақиллигини ва шунга мос равишда унинг президенти сайлови натижаларини тан олмайди.
Изоҳ (0)