Буюк Британия Украинага 1,3 миллиард фунт стерлинг (1,6 миллиард доллар) миқдорида қўшимча ёрдам беради. Бу ҳақда Британия молия вазирлиги раҳбари Риши Сунак маълум қилди. Мазкур ёрдам бош вазир Борис Жонсон томонидан илгари эълон қилинган 300 миллион фунт стерлинг миқдоридаги ёрдам пакетини ўз ичига олади: пакет радиоэлектрон курашиш ускуналари, тунги кўриш мосламалари, сунъий йўлдош навигациясини блоклаш воситалари, оғир дронлар ва антибатарея радиолокацион тизимидан иборат экани айтилганди.
«Буюк Британия Украинага иқтисодий, гуманитар ва ҳарбий ёрдам кўрсатишда биринчи ўринда турибди ва биз урушга чек қўйиш учун тинмай ҳаракат қиламиз», — деди Риши Сунак.
Сунакнинг таъкидлашича, Украина «ҳимоя учун» ҳарбий ёрдамга муҳтож.
Аввалроқ АҚШ президенти Жо Байден Вашингтон Киевга қўшимча ҳарбий ёрдам беришини маълум қилганди. Янги пакетга артиллерия ўқ-дорилари, радарлар ва бошқа жиҳозлар киради, уларнинг қийматига аниқлик киритилмаган.
Байденнинг айтишича, унинг маъмурияти Украинага ҳарбий ёрдам жўнатиш учун Конгресс тасдиғисиз ишлатилиши мумкин бўлган маблағларни «деярли тугатган» ва эндиликда қонунчиларни қўшимча маблағ ажратишни маъқуллашга чақирган.
Апрель охирида АҚШ Конгресси Украинага ленд-лиз дастури доирасида тезлаштирилган тартибда қурол етказиб беришга рухсат берувчи қонун лойиҳасини маъқуллаган эди. Байденнинг имзосидан кейин қонун кучга киради.
Изоҳ (0)