Buyuk Britaniya Ukrainaga 1,3 milliard funt sterling (1,6 milliard dollar) miqdorida qo‘shimcha yordam beradi. Bu haqda Britaniya moliya vazirligi rahbari Rishi Sunak ma’lum qildi. Mazkur yordam bosh vazir Boris Jonson tomonidan ilgari e’lon qilingan 300 million funt sterling miqdoridagi yordam paketini o‘z ichiga oladi: paket radioelektron kurashish uskunalari, tungi ko‘rish moslamalari, sun’iy yo‘ldosh navigatsiyasini bloklash vositalari, og‘ir dronlar va antibatareya radiolokatsion tizimidan iborat ekani aytilgandi.
“Buyuk Britaniya Ukrainaga iqtisodiy, gumanitar va harbiy yordam ko‘rsatishda birinchi o‘rinda turibdi va biz urushga chek qo‘yish uchun tinmay harakat qilamiz”, — dedi Rishi Sunak.
Sunakning ta’kidlashicha, Ukraina “himoya uchun” harbiy yordamga muhtoj.
Avvalroq AQSH prezidenti Jo Bayden Vashington Kiyevga qo‘shimcha harbiy yordam berishini ma’lum qilgandi. Yangi paketga artilleriya o‘q-dorilari, radarlar va boshqa jihozlar kiradi, ularning qiymatiga aniqlik kiritilmagan.
Baydenning aytishicha, uning ma’muriyati Ukrainaga harbiy yordam jo‘natish uchun Kongress tasdig‘isiz ishlatilishi mumkin bo‘lgan mablag‘larni “deyarli tugatgan” va endilikda qonunchilarni qo‘shimcha mablag‘ ajratishni ma’qullashga chaqirgan.
Aprel oxirida AQSH Kongressi Ukrainaga lend-liz dasturi doirasida tezlashtirilgan tartibda qurol yetkazib berishga ruxsat beruvchi qonun loyihasini ma’qullagan edi. Baydenning imzosidan keyin qonun kuchga kiradi.
Izoh (0)