Тошкент халқаро аэропортига келган йўловчилар ўз багажларини онлайн-эфир орқали томоша қилиш имконига эга бўлди, деб хабар беради аэропорт матбуот хизмати.
Багаж бўлинмасидан олинган видео учиш залида икки томондаги юк ленталарининг тепасига ўрнатилган мониторларда кўрсатилади.
«Биз юкларини кутаётган йўловчилар учун багаж бўлинмасида тўғридан-тўғри намойишни йўлга қўйдик. Бу дунёнинг кўплаб аэропортларида қўлланилаётган тажриба. Багаж лентага туширилади ва ҳар бир киши ўз нарсаларига қандай муносабатда бўлаётганини кўриши мумкин. Шунингдек, бу юкчиларни ҳам интизомга чақиради, чунки улар камералар орқали видео учиб келиш залида кўрсатаётгани ҳақида огоҳлантирилади», — дейди Uzbekistan Airports бошқаруви раиси Раъно Жўраева.
Унинг сўзларига кўра, ҳозирда hendling компанияси багажни кутиш вақтига катта эътибор қаратмоқда – бу ўртача 20 дақиқадан ошмаслиги керак.
Таъкидланишича, «Тошкент» халқаро аэропортида бундай янгилик илк маротаба амалга оширилган ва йўловчилар учун хизмат кўрсатиш сифатини яхшилашга, шунингдек, бошқарув компанияси ҳамда аэропортнинг очиқ ахборот сиёсатини шакллантиришга қаратилган.
Аввалроқ Самарқандда 170 млн долларга қайта таъмирланган халқаро аэропорт фойдаланишга топширилгани, Ўзбекистондаги аэропортларни бошқаришга хорижий компаниялар жалб қилиниши тўғрисида хабар берилганди.
Изоҳ (0)