Toshkent xalqaro aeroportiga kelgan yo‘lovchilar o‘z bagajlarini onlayn-efir orqali tomosha qilish imkoniga ega bo‘ldi, deb xabar beradi aeroport matbuot xizmati.
Bagaj bo‘linmasidan olingan video uchish zalida ikki tomondagi yuk lentalarining tepasiga o‘rnatilgan monitorlarda ko‘rsatiladi.
“Biz yuklarini kutayotgan yo‘lovchilar uchun bagaj bo‘linmasida to‘g‘ridan to‘g‘ri namoyishni yo‘lga qo‘ydik. Bu dunyoning ko‘plab aeroportlarida qo‘llanilayotgan tajriba. Bagaj lentaga tushiriladi va har bir kishi o‘z narsalariga qanday munosabatda bo‘layotganini ko‘rishi mumkin. Shuningdek, bu yukchilarni ham intizomga chaqiradi, chunki ular kameralar orqali video uchib kelish zalida ko‘rsatayotgani haqida ogohlantiriladi”, — deydi Uzbekistan Airports boshqaruvi raisi Ra’no Jo‘rayeva.
Uning so‘zlariga ko‘ra, hozirda hendling kompaniyasi bagajni kutish vaqtiga katta e’tibor qaratmoqda – bu o‘rtacha 20 daqiqadan oshmasligi kerak.
Ta’kidlanishicha, “Toshkent” xalqaro aeroportida bunday yangilik ilk marotaba amalga oshirilgan va yo‘lovchilar uchun xizmat ko‘rsatish sifatini yaxshilashga, shuningdek, boshqaruv kompaniyasi hamda aeroportning ochiq axborot siyosatini shakllantirishga qaratilgan.
Avvalroq Samarqandda 170 mln dollarga qayta ta’mirlangan xalqaro aeroport foydalanishga topshirilgani, O‘zbekistondagi aeroportlarni boshqarishga xorijiy kompaniyalar jalb qilinishi to‘g‘risida xabar berilgandi.
Izoh (0)