Ўзбекистонда январь—март ойларида 68 минг 905 дона енгил автомобиль ишлаб чиқарилган. Бу ҳақда Давлат статистика қўмитаси хабар қилди.
Қайд этилишича, енгил автомобиллар ишлаб чиқариш ҳажми 2021 йилнинг мос даври билан солиштирилганда 24 минг 451 тага ошган.
2022 йилнинг дастлабки 3 ойида Ўзбекистон Озарбайжон, Тожикистон, Корея ва Ливанга 58 дона енгил автомобилни экспорт қилган. Бу кўрсаткич 2021 йилнинг мос даври билан солиштирилганда 8 минг 763 тага камайган.
Кўриб чиқилаётган даврда Ўзбекистон 21 та хорижий давлатлардан қиймати 189,3 миллион долларга тенг бўлган 8 минг 508 та енгил автомобиль импорт қилган. Енгил автомобиллар импорти 2021 йилнинг мос даври билан солиштирилганда 5 минг 361 тага ёки 2,7 баробарга ошган.
Эслатиб ўтамиз, Шавкат Мирзиёев 14 февраль куни машинасозлик саноати истиқболларига бағишланган йиғилиш ўтказганди. Унда давлат раҳбари автомобилларни кўпроқ ички бозорга йўналтириб, бутловчи қисмлар ҳисобига йиллик экспортни 500 миллион долларга етказиш топшириғини берган. Шунингдек, импорт автомобиллар учун божхона божини 2 баробарга қисқартириш, автомобиль учун олдиндан тўлов миқдорини 85 фоиздан 50 фоизгача пасайтириш вазифаси қўйилган.
Аввалроқ Ўзбекистонда март ойида энг кўп Cobalt автомобили ишлаб чиқарилгани, 2022 йилнинг январь—март ойларида Ўзбекистон 9 та хорижий давлатдан қиймати 13,5 миллион АҚШ долларига тенг бўлган 455 та электромобиль импорт қилгани тўғрисида хабар берилганди.
Изоҳ (0)