Чортоқ туман электр тармоқлари корхонаси ходимлари тумандаги МЧЖлардан бирига қарашли металлни қайта ишлаш цехида тегишли ҳужжатларсиз юқори кучланишдаги электр узатиш тармоғига уланиб, ноқонуний фойдаланиб келингани аниқлади. Бу ҳақда «Дарё» мухбири Азизбек Абдувалиев хабар бермоқда.
Электр энергиясидан фойдаланиш қоидалари бузилгани ҳақидаги далолатномага асосан ўтказилган қайта ҳисоб-китобда жамият томонидан давлат манфаатларига 1163,4 миллион сўм зарар етказилгани маълум бўлди.
Жамиятга зарарни қоплаш юзасидан хабарнома юборилган бўлса-да, унинг раҳбари томонидан атиги 373,1 миллион сўм тўлов амалга оширилган ва зарарни тўлиқ қоплаш чоралари кўрилмаган.
Қайд этилишича, жамият томонидан «Юридик ва жисмоний шахсларни электр тармоғига улаш бўйича давлат хизматлари кўрсатишнинг маъмурий регламенти»га зид равишда электр тармоғига уланиш учун давлат хизматлари марказига мурожаат қилинмаган ва туман электр тармоқлари корхонаси билан электр энергияси етказиб бериш бўйича шартнома тузилмаган.
Мазкур ҳолат юзасидан жамият раҳбарига нисбатан жиноят иши қўзғатилиб, ҳужжатлар туман прокуратурасига юборилди.
Изоҳ (0)