Chortoq tuman elektr tarmoqlari korxonasi xodimlari tumandagi MCHJlardan biriga qarashli metallni qayta ishlash sexida tegishli hujjatlarsiz yuqori kuchlanishdagi elektr uzatish tarmog‘iga ulanib, noqonuniy foydalanib kelingani aniqladi. Bu haqda “Daryo” muxbiri Azizbek Abduvaliyev xabar bermoqda.
Elektr energiyasidan foydalanish qoidalari buzilgani haqidagi dalolatnomaga asosan o‘tkazilgan qayta hisob-kitobda jamiyat tomonidan davlat manfaatlariga 1163,4 million so‘m zarar yetkazilgani ma’lum bo‘ldi.
Jamiyatga zararni qoplash yuzasidan xabarnoma yuborilgan bo‘lsa-da, uning rahbari tomonidan atigi 373,1 million so‘m to‘lov amalga oshirilgan va zararni to‘liq qoplash choralari ko‘rilmagan.
Qayd etilishicha, jamiyat tomonidan “Yuridik va jismoniy shaxslarni elektr tarmog‘iga ulash bo‘yicha davlat xizmatlari ko‘rsatishning ma’muriy reglamenti”ga zid ravishda elektr tarmog‘iga ulanish uchun davlat xizmatlari markaziga murojaat qilinmagan va tuman elektr tarmoqlari korxonasi bilan elektr energiyasi yetkazib berish bo‘yicha shartnoma tuzilmagan.
Mazkur holat yuzasidan jamiyat rahbariga nisbatan jinoyat ishi qo‘zg‘atilib, hujjatlar tuman prokuraturasiga yuborildi.
Izoh (0)