Тошкент шаҳри Янгиҳаёт туманида фуқароларни алдаб, бир ҳафта муддатда ҳайдовчилик гувоҳномаси олиб бериш учун улардан пул олган шахс қўлга олингани ҳақида хабар берилганди. Миллий масс-медиани қўллаб қувватлаш ва ривожлантириш жамоат фонди Васийлик кенгаши Комил Алламжонов ҳолат юзасидан бўлиб ўтган суд мажлиси ҳақида маълумот берди.
Қайд этилишича, фуқаро Д.га нисбатан Жиноят кодексининг 168-моддаси (фирибгарлик) билан жиноят иши қўзғатилган. Суд қарорига кўра, унга ойлик даромадининг 20 фоизини давлат ҳисобига ушлаб қолган ҳолда 2 йил давомида ахлоқ тузатиш ишлари жазоси тайинланган.
Эслатиб ўтамиз, 16 март куни Комил Алламжонов Ягона имтиҳон маркази имтиҳонларида коррупциявий ҳолатлар йўқлигини айтиб, фуқароларни фирибгарлардан огоҳ бўлишга чақирганди. «Шиоримиз шуки, билимингиз бўлсагина, ҳайдовчилик гувоҳномасини оласиз ва рулга ўтирасиз. Ҳозирда фақат билим, билим, билим! Бошқачасига иложи йўқ», — деган у.
Изоҳ (0)