Ташқи ишлар вазири вазифасини бажарувчи Владимир Норов 28 апрель куни Фаластиннинг Ўзбекистондаги фавқулодда ва мухтор элчиси этиб тайинланган Жавад Муҳаммад Авадни қабул қилди. Бу ҳақда ТИВ ахборот хизмати хабар қилди.
Қайд этилишича, Норов элчидан ишонч ёрлиқлари нусхаларини қабул қилиб олган. У элчини янги лавозимга тайинлангани билан табриклаган ва масъулиятли дипломатик миссиясини амалга оширишда муваффақиятлар тилаган.
Томонлар сиёсий, савдо-иқтисодий ва маданий-гуманитар соҳалардаги икки томонлама муносабатларнинг бугунги ҳолати ва уларни янада ривожлантириш истиқболларини, шунингдек, БМТ, Ислом ҳамкорлик ташкилоти ва бошқа халқаро тузилмалар доирасидаги ўзаро алоқаларнинг долзарб масалаларини муҳокама қилган. Бўлажак турли даражадаги қўшма тадбирлар жадвали юзасидан фикр алмашилган.
Учрашувда томонларни қизиқтирган бошқа масалалар ҳам кўриб чиқилган.
Эслатиб ўтамиз, 29 март куни Ташқи ишлар вазирлиги матбуот хизмати собиқ вазир Абдулазиз Комилов даволаниш учун хорижга жўнаб кетганини маълум қилганди. Хабарда вазир бунгача 10 кун давомида Тиббиёт бош бошқармасининг 1-сон Марказий клиник шифохонасида тиббий муолажалар олгани айтилган. 27 ноябрь куни Абдулазиз Комилов Ўзбекистон президенти ҳузуридаги Хавфсизлик кенгаши котибининг ташқи сиёсат ва хавфсизлик масалалари бўйича ўринбосари лавозимига тайинланди.
Маълумот учун, Абдулазиз Комилов 2012 йилдан бери Ўзбекистон ташки ишлар вазири сифатида фаолият юритиб келаётган эди.
2021 йил декабрида Алишер Комиловга ўринбосар этиб тайинланган Владимир Норов эса ташқи ишлар вазирининг биринчи ўринбосари лавозимига тайинланди, унинг зиммасига Ўзбекистон ташқи ишлар вазири вазифасини бажариш юклатилди.
Владимир Норов 2019–2021 йилларда Шанхай ҳамкорлик ташкилоти бош котиби лавозимида ишлаган.
Изоҳ (0)