Germaniya Federativ Respublikasi prezidenti Frank-Valter Shtaynmayer shu haftada Ukrainaga rasmiy tashrif bilan borishni rejalashtirgandi, biroq Ukraina davlat rahbari Vladimir Zelenskiy uni qabul qilishdan bosh tortdi. Bu haqda Bild nashri xabar bergan.
Zelenskiyning uchrashuvni rad qilishiga Shtaynmayerning so‘nggi yillarda Rossiya bilan yaqin aloqada ekanligi, jumladan, “Shimoliy oqim—2” gaz quvurining qurilishini qo‘llab-quvvatlagani sabab bo‘lgan.
“Hammamiz Shtaynmayerning Rossiya bilan yaqin munosabatda ekanini, barchasi uning formulasida ham mujassam bo‘lib turganini bilamiz. Hozir uni Kiyevda ko‘rib xursand bo‘lishmaydi”, — deya gazetaga axborot bergan ismini oshkor etmagan ukrainalik diplomat.
Germaniya Federativ Respublikasi prezidenti ham Kiyevda uni ko‘rmoqchi emasliklarini tasdiqlagan.
“Polshalik hamkasbim (Polsha prezidenti Anjey Duda) Yevropa birdamligini namoyish qilish uchun Estoniya, Litva va Latviya prezidentlari bilan birgalikda Kiyevga borishimizni taklif etgandi. Men u yerga borishga tayyor edim, biroq Ukraina hukumati mening Kiyevga borishimni istamayapti”, — degan u nemis telekanallaridan biriga bergan intervyusida (“TASS” iqtibosi).
Frank-Valter Shtaynmayer 2017-yildan beri GFR prezidenti lavozimida faoliyat yuritib kelmoqda. 2005—2009 hamda 2013—2017-yillarda u mamlakat tashqi ishlar vaziri lavozimida ishlagan. Rossiya Ukrainaga bostirib kirganidan keyin Shtaynmayer Moskva bilan siyosatdagi xatolarini tan olgan, xususan, “Shimoliy oqim—2” loyihasini qo‘llab-quvvatlash bo‘yicha tashabbuslari ham xato ekanini bildirgandi.
Ukrainaning Bucha shahridagi voqealardan keyin bir qator G‘arb siyosatchilari: Yevrokomissiya raisi Ursula fon der Lyayyen, Yevroittifoqning tashqi ishlar masalalari bo‘yicha oliy vakili Jozep Borrel, shuningdek, Avstriya kansleri Karl Nexammer mamlakatga kelgan. Buyuk Britaniya bosh vaziri Boris Jonson Kiyevga tashrif buyurgan va Zelenskiy bilan muzokaralar olib borgandi.
Izoh (0)