Наманганда Фарғона водийси Фавқулодда вазиятлар бошқармаларининг сувда қутқарув гуруҳлари ғаввосларининг малака ва билимлари синовдан ўтказилмоқда. Бу ҳақда «Дарё» мухбири Азизбек Абдувалиев хабар бермоқда.
Синовлар Наманган шаҳрининг Давлатобод туманида жойлашган очиқ сув ҳавзасида бўлиб ўтмоқда. Уларда ғаввосларнинг сувга чўкканларни қутқариш, уларга биринчи тиббий ёрдам кўрсатиш малакаси ҳам кўрикдан ўтказилмоқда.
«Фавқулодда вазиятлар вазирлиги тизимида сувда қутқарув гуруҳлари ҳам хизмат олиб боради. Уларнинг фаолият доимий ҳушёрлик ва сергаклик, жисмоний ва руҳий тайёргарликни талаб этди. Шу боис Наманган, Андижон ва Фарғона вилоятлари ФВБ сувда қутқарув гуруҳлари ғаввос-қутқарувчиларининг мавсум олдидан малакасини шаҳодатлаш бошланди. Бу жараёнда ғаввос-қутқарувчиларга шўнғишга рухсат бериш, уларга шўнғиши мумкин бўлган чуқурликларни белгилаш, сувда қутқарув гуруҳи шахсий таркибининг амалий ҳамда назарий билимларини синовдан ўтказишга асосий эътибор берилади», — дейди Наманган вилоят ФВБ матбуот хизмати раҳбари Қаҳрамон Сатторов.
Тадбирда водий вилоятларидан жами 50 нафар ғаввос-қутқарувчи иштирок этмоқда. Шаҳодатлаш ва синов жараёнлари уч кун давом этади.
Изоҳ (0)