Тошкент шаҳри Мирзо Улуғбек туманида 10 апрель куни Mercedes-Benz автомашинаси ёниб кетгани ҳақида хабар берилганди. Йўл ҳаракати хавфсизлиги хизмати ёнғиннинг келиб чиқиш сабабини маълум қилди.
Дастлабки маълумотларга кўра, ҳолат 10 апрель куни соат 13:40 ларда Мустақиллик шоҳкўчаси «Пушкин» метро бекати қаршисида содир бўлган. Ҳайдовчи О.О. (1985 йилда туғилган) бошқарувида бўлган Mercedes-Benz GL 500 автомобилнинг двигатель қисмида электр симларида қисқа туташув сабабли ёнғин юзага келган.
Ўт ўчирувчилар воқеа жойига зудлик билан етиб борган ва ёнғин бартараф этилган. Ҳодиса оқибатида тан жароҳати олган фуқаролар йўқ. Ёнғинда автомобилнинг мотор ва салон қисми ёниб зарарланган.
Ҳолат юзасидан Тошкент шаҳар ФВБ ва ЙҲХБ ходимлари томонидан суриштирув ҳаракатлари олиб борилмоқда.
Аввалроқ Наманганда «Жигули» ёниб кетгани, Сергелидаги автосалонда ёнғин чиққани хабар қилинган. Шунингдек, Қашқадарёда ҳаракатланиб кетаётган Spark’нинг мотори ёниб кетгани, Қашқадарёдаги заправкада «КамАЗ» ёниб кетгани ҳақида хабар берилган.
Изоҳ (0)