Шавкат Мирзиёев раислигида 8 апрель куни «Саховат», «Мурувват» ва «Меҳрибонлик» уйлари ҳамда махсус мактаб интернатлари фаолияти бўйича видеоселектор йиғилиши бўлиб ўтди, деб хабар берди «Дарё» мухбири.
Қайд этилишича, президент видеоселектор давомида маҳаллаларни обод, озода ва яшил маконга айлантириш, маданий-маърифий тадбирларни кўпайтириш масаласига ҳам тўхталиб ўтган.
«“Пойтахт – маданият ва маърифат булоғи’ лойиҳаси доирасида, таниқли санъаткорлар, ижодкорлар, маданият ва санъат соҳаси профессор-ўқитувчилари ва талабалар иштирокида 400 дан зиёд маҳаллада мумтоз куй-қўшиқ ва мақом кечалари уюштирилди. Аҳоли учун 40 та спектакль, 70 дан зиёд миллий фильм намойиши, 20 дан ортиқ гала-концерт ташкил қилинди. Яқинда ‘Туркистон’ саройида 5 кун давомида ‘Алишер Навоий’ спектакли намойиш қилиниб, маҳаллалардан 4 мингдан зиёд киши қамраб олинди», — деди Шавкат Мирзиёев.
Президент Тошкент шаҳар ҳокимлиги ҳамда Маданият вазирлигига «темир», «аёллар» ва «ёшлар» дафтарларига киритилган аҳолини театрлар, музей ва концертларга бепул чипталар билан таъминлаш амалиётини йўлга қўйиши кераклиги бўйича топшириқ берган.
«‘Маҳаллада дув-дув гап’ лойиҳаси доирасида ижтимоий ҳимояга муҳтож оилаларнинг 56 нафар фарзандининг суннат тўйлари ўтказиб берилгани, халқимизга хос меҳр-оқибат ва мурувватнинг яна бир намунаси бўлди», — деди президент.
Изоҳ (0)