2021 йилда омбудсман номига фуқаролардан жами 18 минг 738 та мурожаат келиб тушган. Бу ҳақда 4 апрель куни АОКАда бўлиб ўтган брифингда Олий Мажлиснинг Инсон ҳуқуқлари бўйича вакили омбудсман ахборот хизмати раҳбари Фотима Мадраҳимова маълум қилди.
Таъкидланишича, ҳисобот даврида омбудсман томонидан парламент назорати субъекти сифатида 11 минг 257 та мурожаат ўз иш юритувига олинган. Мурожаатларда энг кўп кўтарилган масалалар – фуқароларнинг шахсий мулкка бўлган ҳуқуқлари ва меҳнат ҳуқуқларини таъминлаш, ижтимоий имтиёз ва нафақалар олиш ва бошқалар.
Давлат органлари, ташкилотлар ва судларга фуқароларнинг бузилган ҳуқуқларини тиклаш юзасидан 14 та тақдимнома, 36 та хулоса, 44 та даъво аризалари киритилган.
Жисмоний ва юридик шахслар мурожаатлари билан ишлаш ҳамда ижро интизоми талабларини бузган ва ўз фаолиятида масъулиятсизликка йўл қўйган 82 нафар ходимга нисбатан ҳайфсан, 9 нафар ходимга нисбатан жарима интизомий жазо чораси қўлланган ва 8 нафар ходим эгаллаб турган вазифасидан озод қилинган.
Шунингдек, инсон ҳуқуқлари бўйича вакилга юборилган шахсий ҳуқуқлар ва эркинликларга оид мурожаатларни кўриб чиқиш натижасида 21 та жиноий ва маъмурий ҳамда 9 та интизомий иш қўзғатилган.
Мурожаат қилувчилар устидан жиноят иши қўзғатишни рад этиш тўғрисидаги 29 та қарор бекор қилинган. Масъул мансабдор шахсларнинг ҳаракатларига ҳуқуқий баҳо бериш учун 25 та текширув ўтказилган.
Судларга 442 миллион сўмлик меҳнат ҳақини ундиришга қаратилган 43 та даъво аризаси киритилди, 62 нафар фуқарога 787,8 миллион сўмлик меҳнат ҳақи тўланиши таъминланди, 10 нафар фуқаро ишга тикланди, 5 нафар фуқарога иш жойида меҳнат қобилиятини йўқотганлиги учун соғлигига етказилган 9,2 миллион сўмлик зарар ундирилди, фуқароларга 148 миллион сўмлик кредитларни расмийлаштиришда кўмаклашилди.
Шунингдек, мурожаатчилар фойдасига суд қарорларида белгиланган 210,8 миллион сўмлик зарар ундирилди. Давлат ва жамоат эҳтиёжлари учун ер участкаларининг олиб қўйилиши муносабати билан 14 та фуқарога уй-жой ажратилди. Тадбиркорларга 145 миллион сўмлик ортиқча тўланган солиқ тўловларини қайтариб беришда кўмак берилди.
Изоҳ (0)