Сирдарё вилоятининг Гулистон шаҳрида фуқарони тез ёрдамга диспетчерликка ишга киритиб қўйиш учун 700 доллар сўраган шифокор ушланди, деб хабар беради Бош прокуратура ҳузуридаги департамент.
Маълум қилинишича, департаментнинг Гулистон шаҳар бўлими томонидан тезкор тадбир ўтказилган. Тадбирда Гулистон шаҳар шошилинч тез тиббий ёрдам станцияси навбатчи шифокори Р.Ғ. фуқаро Д.ни танишлари ёрдамида ушбу бўлимга диспетчерлик вазифасига ишга киритиб қўйишни ваъда қилгани аниқланган. Бунинг эвазига шифокор 700 долларни олган вақтида ашёвий далиллар билан ушланган.
Шунингдек, департамент ҳамда ДХХнинг Сурхондарё вилояти бошқармалари томонидан ИИБ ходимлари билан ҳамкорликда тезкор тадбир ўтказилган. Тадбирда Шўрчи туман тиббиёт бирлашмасига қарашли тез тиббий ёрдам бўлими хўжалик бекаси М.И. фуқаро М.ни бирлашмада ишловчи танишлари ёрдамида ҳамшира вазифасида ишга киритиб қўйиш эвазига 1000 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Самарқандда 50 минг доллар эвазига ДХХга ишга киритиб қўймоқчи бўлган шахс қўлга олингани, Андижон ва Хоразм вилоятларида фуқароларни ўқишга киритиш учун жами 3 минг доллар олган шахслар ушлангани тўғрисида хабар берилганди.
Изоҳ (0)