Ижтимоий тармоқларда хориждан ўқишни кўчириш бўйича олий ва ўрта махсус таълим вазирининг биринчи ўринбосари Комилжон Каримов имзоси туширилган хат тарқалди. Олий ва ўрта махсус таълим вазирлиги ушбу хат ва ундаги маълумотлар ҳеч қандай асосга эга эмаслигини маълум қилди.
Тарқалган хатда «олий таълим муассасаларида дарс машғулотларининг бошлангани муносабати билан қўшни республикаларда таҳсил олаётган барча талабаларга ёзги кўчириш даврида тест-синовларсиз, тўловларсиз соддалаштирилган тартибда Ўзбекистонда ўқишга рухсат этилади», дейилган.
«Ҳурматли ижтимоий тармоқ фаоллари! Ҳар хил сохта ахборотларга ишониб қолмасликларингизни яна бир бор сўраб қоламиз ва ОТМга ўқишни кўчиришга доир ҳар қандай хабарнинг ҳақиқийлигини аввал вазирликнинг Telegram’даги @eduuz расмий канали орқали текшириб кўришингизни тавсия этамиз.
Шу билан бирга, асоссиз ва ёлғон ахборотни тарқатганлик учун қонунчиликда жавобгарлик белгиланганини яна бир бор эслатиб ўтамиз», — дейилади муносабатда.
Эслатиб ўтамиз, январь охирларида ижтимоий тармоқларда Олий ва ўрта махсус таълим вазирлиги номидан хориждан ўқишини кўчирмоқчи бўлган талабалар ҳеч қандай имтиҳонларсиз ўқишини Ўзбекистонга кўчиришга рухсат берилиши ва кўчириш учун барча ҳужжатлар 15 февралгача қабул қилиниши тўғрисида хабарлар тарқалганди. Кейинроқ вазирлик бунинг ёлғон эканини тўғрисида муносабат билдирган эди.
Изоҳ (0)