Бухоро вилоятининг Когон туманида метеорологик радиолокатор ускунаси ўрнатилиб, 31 март куни фойдаланишга топширилди. Очилиш маросимида нутқ сўзлаган Гидрометеорология хизмати маркази бош директори Шерзод Ҳабибуллаев худди шундай радиолокатор Ўзбекистоннинг яна иккита ҳудудида ўрнатилишини маълум қилди. Бу ҳақда «Дарё» мухбири хабар бермоқда.
Шерзод Ҳабибуллаевнинг халқаро ташкилотлар ҳисоб-китобига таяниб қайд этишича, Ўзбекистонда табиий офатлар ҳар йили ўртача 1,4 миллион кишининг ҳаётига салбий таъсир кўрсатмоқда. Етказилган зарар йилига қарийб 3 миллиард долларни ташкил этяпти.
«Биргина мисол, 2020 йилда Бухоро вилоятининг Қоракўл ва Олот туманларида кузатилган табиий офат туфайли бир нафар фуқаро вафот этган, 40 нафардан ортиқ киши жароҳатланган. Давлат бюджетига эса 500 миллиард сўмлик зарар етказилган.
Бу каби талафотларнинг олдини олиш ва табиий офатларни юмшатиш мақсадида давлат бюджети ҳисобидан Когон туманида ўрнатилган метеорологик радиолокатор бугун фойдаланишга топширилмоқда.
Шуни алоҳида айтиш керакки, охирги йилларда жуда тез ҳосил бўладиган хавфли ҳалокатли гидрометеорологик ҳодисаларни аниқлаш турли иқлимий моделларга ҳам қийинчиликлар туғдирмоқда. Катта масофаларни кўра оладиган замонавий доплерли метеорологик радиолокатор маълумотларига эҳтиёж ортмоқда. Бу каби бир нечта ускуналарнинг интеграциялашган маҳсули атмосферадаги фактик об-ҳаво жараёнларни реал вақтда кўрсатиш имконини беради», — дейди Ҳабибуллаев.
Унинг қўшимча қилишича, шу пайтга қадар Тошкент, Самарқанд ва Нукус шаҳарлари аэропортларида АҚШ ва Германия компаниялари томонидан ишлаб чиқарилган метеорологик радиолокаторлар ўрнатилган. Мазкур локаторлар авиация учун тайёрланадиган об-ҳаво прогнозлари ишончлилигини янада ошишига, кучли ёмғир, дўл, қор каби ҳодисаларга олиб келувчи кучли булутлиликни аниқлаш ва уни прогнозлашга хизмат қилмоқда.
«Жорий йил якунигача Тўрақўрғон туманига, 2023 йилда Термиз шаҳрига локаторлар ўрнатилиб, ишга туширилади. Келажакда бу каби метеолокаторлар ягона платформага бирлаштирилади. Натижада, республика ҳудудини тўлиқ қамраб олувчи ер усти метеорологик радиолокаторлар ягона тармоғи ташкил этилади ҳамда иқтисодиётнинг об-ҳавога боғлиқ тармоқлари фаолияти барқарорлиги ва аҳоли хавфсизлигини таъминлашга эришилади», — дейди марказ директори.
Изоҳ (0)