«ПСЖ» Франция чемпионатининг 30-турида «Лорян» устидан 5:1 ҳисобида ғалаба қозонди.
Парижликлар ҳужумчилари Лионель Месси, Килиан Мбаппе ва Неймар илк бор бир ўйинда гол урди.
Мбаппе жамоанинг барча голларида иштирок этди: 2 та гол ва 3 та голли узатма. Неймар 12 ва 90-дақиқаларда, Месси эса 73-дақиқада гол урди. Қайд этиб ўтиш жоиз, аргентиналик ҳужумчи февраль ойидан буён Лига 1 да гол ура олмаётган эди.
Ҳужумчилар Месси мавсум бошида «ПСЖ»га келганидан буён бирга ўйнаётганди ва илк бор бир ўйинда учаласи ҳам гол уришга муваффақ бўлди.
Килиан Мбаппе Франция чемпионатининг жорий мавсумида 27 ўйинда иштирок этиб, 17 та гол ва 13 та голли узатмага, Лионель Месси 19 та ўйинда 3 та гол ва 11 та голли узатмага, Неймар эса 16 ўйинда 7 та гол ва 3 та голли узатмага муаллифлик қилган.
«ПСЖ» футболчилари сўнгги ўйинларда доимий равишда хатоларга йўл қўймоқда. «Лорян»га қарши ўйинда Ашраф Ҳакимининг хатоси туфайли Терем Моффи парижликлар дарвозасини ишғол қилди.
Opta хабарига кўра, «ПСЖ» барча мусобақалардаги сўнгги 6 ўйинда гол билан тугаган 4 та хатога йўл қўйган. Таққослаш учун, парижликлар мавсум стартидаги 36 ўйинда фақат битта голга олиб келган хатога йўл қўйганди.
Франция чемпионатининг ортда қолган 30 туридан сўнг парижликлар 68 очко билан мусобақа пешқадами бўлиб турибди.