«ПСЖ» ҳужумчиси Килиан Мбаппе келажаги борасидаги саволларга жавоб берди.
«Ҳали келажагим борасида бир қарорга келмадим, буни ҳамма билади. Таклифларни кўриб чиқяпман, янги маълумотлар қўшилди, кўп нарсалар ўзгарган. Агар қарор қабул қилиб бўлганимда, буни маълум қилган бўлардим.
‘ПСЖ’да қолишим мумкинми? Ҳа, албата», — дейди Мбаппе.
23 ёшли француз 30 июнь куни эркин агентга айланади. Килианга асосий даъвогар «Реал» бўлиб турибди.
«ПСЖ» Мбаппега 50 миллион евро маош ва яна қўшимча 100 миллион евро бонус билан янги шартнома таклиф қилгани ҳақида хабар берилганди.
Бунгача Килиан «ПСЖ» тарихида энг яхши тўпурарга айланиш учун клубда қолиши мумкинлиги хабар қилинганди. Шунингдек, Франциянинг амалдаги ва собиқ президентлари ҳам Килиан Мбаппега «ПСЖ»да қолишни маслаҳат берганди.
Мбаппе 2017 йилдан буён «ПСЖ» шарафини ҳимоя қилиб келмоқда. Жорий мавсум футболчи Франция чемпионатининг 27 ўйинида иштирок этиб, 17 та гол ва 13 та голли узатмага муаллифлик қилди.