Пентагон миллий хавфсизлик стратегиясида Россия ва Хитойдан келадиган таҳдидларни маълум қилди

Пентагон 2022 йил учун миллий хавфсизлик стратегиясини тайёрлади. Ҳужжатда келтирилишича, Россия «кучли хавф» туғдирмоқда, Хитой эса Қўшма Штатларнинг «энг муҳим стратегик рақиби» дея келтирилган.

Стратегияга кўра, Россия томонидан таҳдидларга мамлакат томонидан Украинада ўтказилаётган ҳарбий операция мисол қилиб кўрсатилган. «Биз НАТОдаги иттифоқчиларимиз ва шерикларимиз билан Россия тажовузига қарши ишончли тўсиқни кучайтириш бўйича ҳамкорликни давом этамиз», — дейилади Пентагон хабарида.

Ҳужжатда АҚШ учун рақиблар қаторида Шимолий Корея, Эрон ва экстремистик ташкилотлар ҳам келтирилган.

Шунингдек, Пентагон миллий мудофаа соҳасидаги устувор мақсадларини эълон қилган:

• Хитойдан келаётган таҳдид ортиб бораётган бир пайтда ватанни ҳимоя қилиш;
• АҚШ, унинг иттифоқчилари ва шерикларига қарши стратегик ҳужумларга қарши туриш;
• Хитойнинг Ҳинд—Тинч океани минтақасида ҳамда Россиянинг Европада тажовузларини тўхтатиш, таҳдидларига тайёр туриш.

АҚШ президенти ҳар йили миллий хавфсизлик стратегиясини янгилаши керак. Бироқ давлат раҳбари Жо Байден уни 2021 йилда тақдим этмасдан, ҳужжатни 2022 йилнинг биринчи чорагига тайёрлашни буюрганди.

Россия ушбу ҳужжатда «кучли хавф» деб аталаши ҳақида аввалроқ Reuters манбаси ҳам хабар берганди. Шу билан бирга, агентлик суҳбатдоши Украинадаги қуролли можаро якунлангач, Россия ҳарбий ва сиёсий жиҳатдан анча кучсизланиб қолиши, шу сабабли узоқ муддатли муаммони юзага келтира олмаслигини таъкидлаган. Politico Байден стратегияни Украинадаги воқеалар сабаб қайта кўриб чиқишга қарор қилганини ёзган эди.