Pentagon 2022-yil uchun milliy xavfsizlik strategiyasini tayyorladi. Hujjatda keltirilishicha, Rossiya “kuchli xavf” tug‘dirmoqda, Xitoy esa Qo‘shma Shtatlarning “eng muhim strategik raqibi” deya keltirilgan.
Strategiyaga ko‘ra, Rossiya tomonidan tahdidlarga mamlakat tomonidan Ukrainada o‘tkazilayotgan harbiy operatsiya misol qilib ko‘rsatilgan. “Biz NATOdagi ittifoqchilarimiz va sheriklarimiz bilan Rossiya tajovuziga qarshi ishonchli to‘siqni kuchaytirish bo‘yicha hamkorlikni davom etamiz”, — deyiladi Pentagon xabarida.
Hujjatda AQSH uchun raqiblar qatorida Shimoliy Koreya, Eron va ekstremistik tashkilotlar ham keltirilgan.
Shuningdek, Pentagon milliy mudofaa sohasidagi ustuvor maqsadlarini e’lon qilgan:
- Xitoydan kelayotgan tahdid ortib borayotgan bir paytda vatanni himoya qilish;
- AQSH, uning ittifoqchilari va sheriklariga qarshi strategik hujumlarga qarshi turish;
- Xitoyning Hind—Tinch okeani mintaqasida hamda Rossiyaning Yevropada tajovuzlarini to‘xtatish, tahdidlariga tayyor turish.
AQSH prezidenti har yili milliy xavfsizlik strategiyasini yangilashi kerak. Biroq davlat rahbari Jo Bayden uni 2021-yilda taqdim etmasdan, hujjatni 2022-yilning birinchi choragiga tayyorlashni buyurgandi.
Rossiya ushbu hujjatda “kuchli xavf” deb atalashi haqida avvalroq Reuters manbasi ham xabar bergandi. Shu bilan birga, agentlik suhbatdoshi Ukrainadagi qurolli mojaro yakunlangach, Rossiya harbiy va siyosiy jihatdan ancha kuchsizlanib qolishi, shu sababli uzoq muddatli muammoni yuzaga keltira olmasligini ta’kidlagan. Politico Bayden strategiyani Ukrainadagi voqealar sabab qayta ko‘rib chiqishga qaror qilganini yozgan edi.
Izoh (0)