Украинадан Польшанинг Катовице аэропорти орқали 2022 йил 23 март куни 146 нафар Ўзбекистон фуқароси, шу жумладан, 42 нафар аёл, 12 нафар вояга етмаган шахс ва 2 нафар чақалоқ олиб келинди. Бу ҳақда Ташқи ишлар вазирлиги расмий вакили хабар қилди.
Маълум қилинишича, эвакуация учун 28 февралдан 24 мартга қадар 27 та авиарейс ташкиллаштирилган ҳамда ҳарбий ҳаракатлар кечаётган ҳудудлардан 6 030 нафар ўзбекистонлик қайтарилган.
«Ўзбекистоннинг Украинадаги элчихонаси (вақтинча Львов шаҳрида жойлашган) Ўзбекистоннинг Польшадаги элчихонаси билан биргаликда ватандошлар билан доимий алоқада бўлиб, уларни эвакуация қилиш ишларини мувофиқлаштирмоқда», – дейилади ахборотда.
Аввалроқ Ташқи ишлар вазирлигининг «Дунё» ахборот агентлиги эвакуация жараёнлари якунлангани ҳақида хабар берган эди.
Изоҳ (0)