Шавкат Мирзиёев 24 март куни Халқаро инвестиция форуми доирасида Ўзбекистонда амалий ташриф билан бўлиб турган Туркий давлатлар ташкилоти Оқсоқоллар кенгаши раиси, Туркиянинг Адолат ва тараққиёт партияси раисининг ўринбосари Бинали Йилдиримни қабул қилди. Бу ҳақда Президент матбуот хизмати хабар қилди.
Қайд этилишича, учрашув аввалида Бинали Йилдирим давлат раҳбарига Туркия президенти Ражаб Тоййиб Эрдўғоннинг саломи ва эзгу тилакларини етказган. Мирзиёев Ўзбекистон—Туркия стратегик шериклик муносабатларининг бугунги даражасини мамнуният билан қайд этган.
Бугунги кунда Ўзбекистон ва Туркия ўртасидаги Стратегик шериклик бўйича олий даражадаги кенгашнинг навбатдаги йиғилишини ўтказишга фаол тайёргарлик кўрилмоқда.
Туркий давлатлар ташкилоти доирасидаги ҳамкорлик масалалари кўриб чиқилган. Ўтган йил ноябрь ойида ташкилотнинг Истанбул саммитида эришилган келишувларни амалга оширишга алоҳида эътибор қаратилган.
Савдо, транспорт ва логистика, саноат кооперацияси, «яшил» иқтисодиётни ривожлантириш, инновациялар ва юқори технологиялар трансфери каби соҳалардаги қўшма ташаббус ва лойиҳаларни илгари суриш масалалари муҳокама қилинган. Минтақа кун тартибидаги долзарб масалалар юзасидан ҳам фикр алмашилган.
Мавзуга доир:
Изоҳ (0)