«ЎзPTХБ» АЖ ахборот хизматининг хабар қилишича, Шакарнинг биржадаги нархи бир тоннаси учун 10 101,3 минг сўмдан 8 735,8 минг сўмгача пасайди. Бу ҳақда «ЎзPTХБ» АЖ ахборот хизмати хабар бермоқда.
2022 йил 24 мартда Ўзбекистон республика товар-хом ашё биржасининг очиқ биржа савдоларига қўйилаётган шакар ҳажмини сотувчи корхоналар томонидан қарийб 50 фоизга оширилди. Бунинг эвазига шакарнинг барча категорияси бўйича шаклланган ўртача кунлик нархи аввалги савдо кунига нисбатан маҳсулотнинг бир тоннаси учун 10 101,3 минг сўмдан 8 735,8 минг сўмгача, яъни 14 фоизга пасайди.
Сўнги икки савдо кунларида шакарнинг биржадаги нархи қарийб 30 фоизга арзонлашган.
Хоразм шакар заводи ходими Ўзбекистон Бош прокуратураси ҳузуридаги Иқтисодий жиноятларга қарши курашиш департаментига берган интервьюсида тадбиркорларни нархлар ошишида айблади.
Биржа савдолари орқали узлуксиз равишда шакар маҳсулотини етказиб турибмиз. Лекин бу шакар маҳсулотини баъзи бир ваҳимага тушиб қолган тадбиркорларимиз талабдан кўра кўп миқдорда олиши натижасида нарх сунъий равишда ошиб кетди. Бунга асос йўқ, — деди у.Корхона вакили хориж давлатларидан содир бўлаётган жараёнлар Ўзбекистонда шакар ишлаб чиқаришга таъсир кўрсатмаслигини таъкидлади.
Шакарнинг биржадаги нархининг пасайишига бозор воситаларини қўлланилиши, жумладан, биржанинг шакар сегментида таклиф даражасини оширилиши ҳисобига эришилди.
Хусусан, 24 мартда биржа савдоларига жами 3 200 тонна шакар қўйилган бўлиб, улардан 2874 тоннаси, яъни 90 фоизи сотилди. Бунда, биржа савдолари орқали «Хоразм шакар» МЧЖ томонидан 1 600 тонна ва «Ангрен шакар» МЧЖ томонидан 1 274 тонна шакар сотилди.
Аввалроқ Украина мамлакат ҳудудида шакар экспортини тақиқлагани ҳақида хабар берилган эди. Яқин кунларда худди шундай қарор Россия томонидан ҳам қабул қилинади. Бундан кейин биржада шакар нархлари қимматлашди.
Изоҳ (0)