Тошкент вилоятининг Олмалиқ шаҳрида чегарадан ноқонуний равишда қарийб 6 килограмм гашиш гиёҳвандлик моддасини олиб ўтган шахс қўлга олинди.
Маълум қилинишича, Давлат хавфсизлик хизмати ходимлари томонидан бошқа ҳуқуқни муҳофаза қилувчи идоралар билан ҳамкорликда тезкор тадбир ўтказилган. Тадбир давомида Тожикистоннинг Сўғд вилояти Мастчоҳ туманида яшовчи 41 ёшли фуқаро 5,8 килограмм гашиш моддасини ўзбек—тожик давлат чегарасидан контрабанда йўли билан ўтказиб, Тошкент вилоятининг Олмалиқ шаҳрида хуфиёна жойга яширган вақтида қўлга олинган.
Фарғона вилоятида кузатилган ҳолатда эса Риштон туманида яшовчи 29 ёшли шахснинг топшириғига кўра, Марғилон шаҳрида истиқомат қилувчи икки фуқаро (1985- ва 1990 йилларда туғилган) Тошкент вилоятининг Оҳангарон туманига борган ва муқаддам тожикистонлик наркокурьер томонидан контрабанда йўли билан ўтказилиб, хуфиёна жойга яшириб кетилган 2,67 килограмм гашиш моддасини олиб, ортга қайтгани аниқланган.
Улар келаётган автотранспорт воситаси ДХХнинг Фарғона вилояти бўйича бошқармаси ходимлари томонидан Йўл ҳаракати хавфсизлиги ходимларини жалб этган ҳолда Данғара туманида тўхтатилиб, наркокурьерлар қўл олинган. Шунингдек, ушбу гиёҳвандлик моддасининг буюртмачиси ҳисобланган риштонлик фуқаро ҳам ушланган.
Бундан ташқари, Сурхондарё вилоятининг Денов туманида яшовчи 39 ёшли шахс 1,88 килограмм опий моддасини Самарқанд вилоятининг Тайлоқ туманига олиб келиб, фуқарога (1980 йилда туғилган) сотаётган вақтида, уларнинг иккаласи ҳам ДХХ ходимлари томонидан қўлга олинган. Шунингдек, Тожикистондан ўтказилган ушбу наркотикнинг эгаси — деновлик 37 ёшли фуқаро ҳам ушланган.
Тошкент вилоятининг Чирчиқ шаҳрида яшовчи 26 ёшли фуқаро «Бек Барака» савдо мажмуаси ёнида ДХХнинг Тошкент вилояти бўйича бошқармаси ва Божхона қўмитаси ходимлари томонидан тўхтатилиб текширилганда, унинг ёнида 926 грамм опий моддаси борлиги аниқланган. Шунингдек, унинг 29 ёшли акасининг Янгийўл туманидаги вақтинча яшаш хонадонидан 369 грамм опий моддаси процессуал тартибда расмийлаштириб олинган. Суриштирув ҳаракатлари давомида ушбу гиёҳвандлик воситалари муқаддам учинчи шахслар томонидан Тожикистондан контрабанда йўли билан Тошкент вилояти ҳудудига ўтказилганлиги маълум бўлган.
Қашқадарёда кузатилган ҳолатда Сурхондарё вилоятида яшовчи, муқаддам гиёҳвандлик воситалари билан боғлиқ жиноят содир этгани учун судланган икки фуқаро (1985 ва 1987 йилларда туғилган) 514 грамм опий моддасини Денов туманидан Косон туманига олиб кетаётган вақтларида ушланган.
Андижон вилоятида ўтказилган тезкор тадбирда эса Хўжаобод туманида яшовчи 31 ёшли шахс 4480 дона «Лирика» ва 895 дона «Тропикамид» кучли таъсир қилувчи дори воситаларини 20 минг долларга сотаётган вақтида қўлга олинган.
Қўқон шаҳрида қайд этилган ҳолатда 35 ёшли фуқаронинг яшаш хонадонида 1160 дона «Селофен», 60 дона «Тропикамид», шунингдек, унинг шериги, 37 ёшли шахсга тегишли Nexia русумли автомашинада 2240 дона «Регапен» ва 100 дона «Тропикамид» кучли таъсир қилувчи дори воситалари борлиги аниқланиб, ўрнатилган тартибда олиб қўйилган.
Сирдарё вилоятининг Ховос туманида яшовчи 29 ёшли фуқаро муқаддам Қирғизистондан Наманган вилоятининг Янгиқўрғон тумани ҳудудига ўтказилган 1218 дона «Лирика» ва 898 дона «Тропикамид» кучли таъсир қилувчи дори воситаларини олиб келаётган вақтида Ширин шаҳрида қўлга олинган.
Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)