Toshkent viloyatining Olmaliq shahrida chegaradan noqonuniy ravishda qariyb 6 kilogramm gashish giyohvandlik moddasini olib o‘tgan shaxs qo‘lga olindi.
Ma’lum qilinishicha, Davlat xavfsizlik xizmati xodimlari tomonidan boshqa huquqni muhofaza qiluvchi idoralar bilan hamkorlikda tezkor tadbir o‘tkazilgan. Tadbir davomida Tojikistonning So‘g‘d viloyati Mastchoh tumanida yashovchi 41 yoshli fuqaro 5,8 kilogramm gashish moddasini o‘zbek—tojik davlat chegarasidan kontrabanda yo‘li bilan o‘tkazib, Toshkent viloyatining Olmaliq shahrida xufiyona joyga yashirgan vaqtida qo‘lga olingan.
Farg‘ona viloyatida kuzatilgan holatda esa Rishton tumanida yashovchi 29 yoshli shaxsning topshirig‘iga ko‘ra, Marg‘ilon shahrida istiqomat qiluvchi ikki fuqaro (1985- va 1990-yillarda tug‘ilgan) Toshkent viloyatining Ohangaron tumaniga borgan va muqaddam tojikistonlik narkokuryer tomonidan kontrabanda yo‘li bilan o‘tkazilib, xufiyona joyga yashirib ketilgan 2,67 kilogramm gashish moddasini olib, ortga qaytgani aniqlangan.
Ular kelayotgan avtotransport vositasi DXXning Farg‘ona viloyati bo‘yicha boshqarmasi xodimlari tomonidan Yo‘l harakati xavfsizligi xodimlarini jalb etgan holda Dang‘ara tumanida to‘xtatilib, narkokuryerlar qo‘l olingan. Shuningdek, ushbu giyohvandlik moddasining buyurtmachisi hisoblangan rishtonlik fuqaro ham ushlangan.
Bundan tashqari, Surxondaryo viloyatining Denov tumanida yashovchi 39 yoshli shaxs 1,88 kilogramm opiy moddasini Samarqand viloyatining Tayloq tumaniga olib kelib, fuqaroga (1980-yilda tug‘ilgan) sotayotgan vaqtida, ularning ikkalasi ham DXX xodimlari tomonidan qo‘lga olingan. Shuningdek, Tojikistondan o‘tkazilgan ushbu narkotikning egasi — denovlik 37 yoshli fuqaro ham ushlangan.
Toshkent viloyatining Chirchiq shahrida yashovchi 26 yoshli fuqaro “Bek Baraka” savdo majmuasi yonida DXXning Toshkent viloyati bo‘yicha boshqarmasi va Bojxona qo‘mitasi xodimlari tomonidan to‘xtatilib tekshirilganda, uning yonida 926 gramm opiy moddasi borligi aniqlangan. Shuningdek, uning 29 yoshli akasining Yangiyo‘l tumanidagi vaqtincha yashash xonadonidan 369 gramm opiy moddasi protsessual tartibda rasmiylashtirib olingan. Surishtiruv harakatlari davomida ushbu giyohvandlik vositalari muqaddam uchinchi shaxslar tomonidan Tojikistondan kontrabanda yo‘li bilan Toshkent viloyati hududiga o‘tkazilganligi ma’lum bo‘lgan.
Qashqadaryoda kuzatilgan holatda Surxondaryo viloyatida yashovchi, muqaddam giyohvandlik vositalari bilan bog‘liq jinoyat sodir etgani uchun sudlangan ikki fuqaro (1985 va 1987-yillarda tug‘ilgan) 514 gramm opiy moddasini Denov tumanidan Koson tumaniga olib ketayotgan vaqtlarida ushlangan.
Andijon viloyatida o‘tkazilgan tezkor tadbirda esa Xo‘jaobod tumanida yashovchi 31 yoshli shaxs 4480 dona “Lirika” va 895 dona “Tropikamid” kuchli ta’sir qiluvchi dori vositalarini 20 ming dollarga sotayotgan vaqtida qo‘lga olingan.
Qo‘qon shahrida qayd etilgan holatda 35 yoshli fuqaroning yashash xonadonida 1160 dona “Selofen”, 60 dona “Tropikamid”, shuningdek, uning sherigi, 37 yoshli shaxsga tegishli Nexia rusumli avtomashinada 2240 dona “Regapen” va 100 dona “Tropikamid” kuchli ta’sir qiluvchi dori vositalari borligi aniqlanib, o‘rnatilgan tartibda olib qo‘yilgan.
Sirdaryo viloyatining Xovos tumanida yashovchi 29 yoshli fuqaro muqaddam Qirg‘izistondan Namangan viloyatining Yangiqo‘rg‘on tumani hududiga o‘tkazilgan 1218 dona “Lirika” va 898 dona “Tropikamid” kuchli ta’sir qiluvchi dori vositalarini olib kelayotgan vaqtida Shirin shahrida qo‘lga olingan.
Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Izoh (0)