«Сени ўлдираман». «ПСЖ» президенти «Реал»га қарши ўйиндан сўнг ҳакамлар ва мадридликлар вакилига нисбатан қўпол муносабатда бўлди

«ПСЖ» президенти Носир ал-Ҳелайфи «Реал»га қарши ўйинда ҳакамлар қароридан норози бўлди.

Учрашув якунлангач, ал-Ҳелайфи Данни Маккели бошчилигидаги ҳакамларга ўз норозилигини билдириш учун учун «Сантьяго Бернабеу» трибуналари остига йўл олган. Йўл-йўлакай қатарлик тадбиркор бақирган ва атрофга нарсаларни улоқтирган.

Marca’нинг хабарига кўра, функционер дастлаб, ҳакамлар хонасини топа олмаган. У адашиб, «Реал» делегати Карлос Давила хонасига кириб кетган. Воқеага бир неча киши аралашишга мажбур бўлган ва ал-Ҳелайфини зўрға олиб чиқиб кетган.

«Реал» делегати вазиятни тасвирга олишга ҳаракат қилган. Буни кўрган ал-Ҳелайфи «сени ўлдираман», дея бақирган ҳолда унга яқинлашган. «ПСЖ» президентини ўзининг қўриқчилари тўхтатиб қолган.

Учрашув бош ҳаками Данни Маккели ушбу ҳолатни ўз протоколига киритган ва УЕФАга шикоят хати ёзган.

«‘ПСЖ’ президенти (Носир ал-Ҳелайфи) ва техник директори (Леонардо) тажовузкор ҳаракат қилиб, ҳакамлар хонасига киришга уринди.

Ҳакам улардан кетишни сўрагач, улар эшикни тўсиб қўйди, президент эса ёрдамчи ҳакамлардан бирининг байроғини уриб, синдирди», — дейилади баёнотда.

«Реал» Чемпионлар Лигаси 1/8 финали жавоб учрашувида «ПСЖ» устидан 3:1 ҳисобида ғалаба қозонди ва кейинги босқич йўлланмасига эга чиқди. Жамоалар ўртасидаги биринчи учрашувда парижликларнинг қўли баланд келганди.