“Seni o‘ldiraman”. “PSJ” prezidenti “Real”ga qarshi o‘yindan so‘ng hakamlar va madridliklar vakiliga nisbatan qo‘pol munosabatda bo‘ldi

“PSJ” prezidenti Nosir al-Helayfi “Real”ga qarshi o‘yinda hakamlar qaroridan norozi bo‘ldi.

Uchrashuv yakunlangach, al-Helayfi Danni Makkeli boshchiligidagi hakamlarga o‘z noroziligini bildirish uchun uchun “Santyago Bernabeu” tribunalari ostiga yo‘l olgan. Yo‘l-yo‘lakay qatarlik tadbirkor baqirgan va atrofga narsalarni uloqtirgan.

Marca’ning xabariga ko‘ra, funksioner dastlab, hakamlar xonasini topa olmagan. U adashib, “Real” delegati Karlos Davila xonasiga kirib ketgan. Voqeaga bir necha kishi aralashishga majbur bo‘lgan va al-Helayfini zo‘rg‘a olib chiqib ketgan.

“Real” delegati vaziyatni tasvirga olishga harakat qilgan. Buni ko‘rgan al-Helayfi “seni o‘ldiraman”, deya baqirgan holda unga yaqinlashgan. “PSJ” prezidentini o‘zining qo‘riqchilari to‘xtatib qolgan.

Uchrashuv bosh hakami Danni Makkeli ushbu holatni o‘z protokoliga kiritgan va UEFAga shikoyat xati yozgan.

“‘PSJ’ prezidenti (Nosir al-Helayfi) va texnik direktori (Leonardo) tajovuzkor harakat qilib, hakamlar xonasiga kirishga urindi.

Hakam ulardan ketishni so‘ragach, ular eshikni to‘sib qo‘ydi, prezident esa yordamchi hakamlardan birining bayrog‘ini urib, sindirdi”, — deyiladi bayonotda.

“Real” Chempionlar Ligasi 1/8 finali javob uchrashuvida “PSJ” ustidan 3:1 hisobida g‘alaba qozondi va keyingi bosqich yo‘llanmasiga ega chiqdi. Jamoalar o‘rtasidagi birinchi uchrashuvda parijliklarning qo‘li baland kelgandi.