Davlat xavfsizlik xizmati xodimlari xalqaro terroristik tashkilotga aloqadorligi uchun qidiruvda bo‘lgan, 26 yoshli S.S.ni xorijdan O‘zbekistonga olib keldi. Bu haqda idora matbuot xizmatiga tayanib, O‘zA xabar berdi.

Ma’lum qilinishicha, ushbu shaxs internet tarmog‘i orqali Suriya davlati hududidagi “Tavhid va jihod katibasi” xalqaro terroristik tashkiloti a’zolarining ta’siriga tushib qolgan. U o‘zining tanishlari bilan Telegram messenjerida virtual guruh tashkil etib, ekstremistik oqimlar va xalqaro terroristik tashkilotlar g‘oyaviy rahnamolarining “jihod”ga chorlovchi materiallarini joylab, o‘zaro muhokama qilgan. Shuningdek, ular Suriyadagi “Tavhid va jihod katibasi” terroristik tashkilotiga qo‘shilish uchun O‘zbekistondan chiqib ketmoqchi bo‘lgan.

Huquq-tartibot idoralari tomonidan ko‘rilgan chora-tadbirlar natijasida ularning noqonuniy harakatlari fosh etilgan hamda 2018-yilning iyun oyida S.S. va uning jinoiy aloqalariga nisbatan qo‘zg‘atilgan jinoyat ishi yuzasidan sayyor sud majlisi o‘tkazilib, S.S.ga nisbatan insonparvarlik prinsipini qo‘llagan holda 4 yil ozodlikni cheklash jazosi tayinlangan.

Biroq S.S. Suriyadagi jangarilar safiga qo‘shilish maqsadida aylanma yo‘llar orqali davlat chegarasini kesib o‘tib, Markaziy Osiyo davlatlarining biriga borgan vaqtida hibsga olingan.

Hozirda unga nisbatan qo‘zg‘atilgan jinoyat ishi doirasida tergov harakatlari olib borilmoqda.

Avvalroq O‘zbekistonda qidiruvda bo‘lgan shaxs Rossiyada qo‘lga olingani, Rossiyada giyohvand moddalar savdosi bilan shug‘ullangan o‘zbekistonlik aka-uka 6 yilga qamalgani, O‘zbekistonda firibgarlik sodir etgani uchun xalqaro qidiruvda bo‘lgan ikki fuqaro Janubiy Koreyadan ekstraditsiya qilingani to‘g‘risida xabar berilgandi.