Жасур Умировдан Фаррух Зокировгача. «Сен азиз ва муқаддассан, аёл» гала концертидан репортаж (видео)

«Сен азиз ва муқаддассан, аёл» концерт дастури режиссёр Саъдулла Абдуллаев томонидан 24 йилдан буён ташкил этилади. Бу йил ҳам олти сеансдан иборат концерт ўтказилди. Концерт мухлислар соғинган хонандаларнинг ташрифига, ранг-баранг рақслар ва кутилмаган сюрпризларга бой бўлди. Дастурда машҳур санъаткорлар билан бирга, истеъдодли ва санъат оламига энди қадам қўяётган ижрочилар ҳам иштирок этди.

— Шу кунгача 30 дан ортиқ давлатга борганман. Аммо ҳеч ерда ўзбек аёлларидек гўзал, сабрли ва меҳнатсевар инсонлар йўқ. Байрам билан барча аёлларни табриклайман. Бундан кейинги ижодим аввалгисидан ҳам зўр бўлади. Насиб қилса, май ойида яккахон концерт дастуримни ҳам тақдим этамиз, — дейди хонанда Жасур Умиров.

Концерт театрлаштирилган томошаларга бой бўлди. Режиссёр навбатдаги концертида жонли клипларга алоҳида эътибор берган.

Ёш ижодкорларни саҳнага олиб чиқишдан ҳайиқмайдиган режиссёр Саъдулла Абдуллаев навбатдаги концертида Азизбек Ғуломов исмли ёш хонандани олиб чиқди. У Ўзбекистон халқ артисти Ғуломжон Ёқубовнинг набираси ҳисобланади. У концертда «Мама» қўшиғи билан иштирок этди. Болакайнинг гапига кўра, уни концертга режиссёр Саъдулла Абдуллаев таклиф этган.

— Аёлларсиз ҳаётни тасаввур этиш қийин. Агар аёл киши етти кун туғуруқхонада бўлса, эркак уйидан пайпоғини ҳам тополмай қолади. Уйнинг файз-баракаси, саранжомлиги аёлларга боғлиқ. Байрам муборак бўлсин, азиз аёллар, — деди қизиқчи Зокир Очилдиев.

Концертда бастакор Султонали Раҳматовнинг янги мусиқий асарлари билан иштирок этди. Айниқса, унинг «Зикр» мусиқаси томошабинлар томонидан илиқ қарши олинди. Унга ажойиб рақс композиция саҳналаштирилган.

— Байрамга қимматбаҳо совға кутмайман, эътиборнинг ўзи катта совға. Турмуш ўртоғим совға танлашга уста, аммо у инсоннинг айтган ширин сўзи ҳам ҳар қандай совғадан қадрлироқ. Аёлларга бахт ва омад тилайман. Ҳеч биримизни гўзаллик ва соғлиқ тарк этмасин, — дейди хонанда Умидахон.

Бастакор Султонали Раҳматовнинг қўшиқлари тингловчилар томонидан ана шундай қарши олинди.

Дастурнинг доимий бошловчилари  Мирзабек Холмедов, Музаффар Мирзараҳимов, Зокир Очилдиев, Ўткир Муҳаммадхўжаев ва Олимжон Ўрозовлар томошага янада файз бағишлади.

— Ёш ижодкорларни катта саҳнага олиб чиқишдан қўрқмайман. Чунки ўзим ҳам бир пайтлар қандайдир тўсиқларни енгиб, қийинчилик билан бу кунларга етганман. Шу боис ҳар йилги концертда янги овозларни олиб чиқишга ҳаракат қиламан. Албатта, бу айрим томошабинларга ёқмайди. Сокин қўшиқлар кўпайиб кетибди, нега танилмаганларни олиб чиқдингиз, дейишади. Уларга бир пайтлар Озодбек Назарбековни катта саҳнага олиб чиққанимда уни ҳеч ким танимасди, бугун эса эл суйган санъаткор ва вазир лавозимларига кўтарилди, дейман. Дилноза Исмияминова, Самандар Ҳамроқулов ва Малика Равшанова ҳам ана шундай «топилма» бўлишган.Ҳар йилги концерт дастурида янгилик қилишга интиламан. Чунки гала-концертда фақат қўшиқчининг машҳурлигига суяниб қолиш керакмас. Режиссёр ўзи ҳис қилаётганларни кўрсата олиши керак, — дейди концерт режиссёри Саъдулла Абдуллаев.

Томоша концерт гимнига айланган «Сен азиз ва муқаддассан, аёл» қўшиғи билан якунланди. Фақат навбатдаги қўшиқни ёш ижрочилар куйлади.