Кучли шамол Самарқанд, Нукус ва Қаршидаги уйлар томини учириб юборди (фото)

Ўзбекистоннинг қатор вилоятларида кузатилган кучли шамол айрим биноларнинг том қисмини учириб юборди, деб хабар беради ФВВ матбуот хизмати.

Маълум қилинишича, шамол 5 март куни соат 05:30 ларда Самарқанд вилояти Каттақўрғон шаҳар «Ватанпарвар» МФЙда жойлашган кўп қаватли уйнинг тахминан 120 квадрат метр, Ўзбекистон кўчасида жойлашган Стоматология биносининг 100 квадрат метр, «Дўстлик» МФЙда жойлашган кўп қаватли уйнинг 250—300 квадрат метр майдондаги том қисмини учириб юборган.

Шунингдек, соат 08:10 да Нукус шаҳар А.Дўсназаров кўчасида жойлашган уйнинг 350 квадрат метр, Қарши шаҳри 8-митти туман Алишер Навоий кўчасида жойлашган уйнинг эса 100 квадрат метр майдонда том қисмлари шамол оқибатида ерга тушган.

Воқеа жойларига ФВВнинг ҳудудий бошқармалари раҳбаряти ва қутқарув бўлинмалари жалб этилиб, кучли шамол талафотларини бартараф этиш ишлари олиб борилган.

Ҳодиса оқибатида тан жароҳати олиш ва ҳалок бўлиш ҳолатлари қайд этилмаган.

Эслатиб ўтамиз, «Ўзгидромет» ҳафтанинг иккинчи ярмидан Эрон ҳудудларидан жуда илиқ ҳаво шиддатли кириб келиши кутилаётгани, бу 4 март куни шамолнинг 15-20 метр/секундгача кучайишига сабаб бўлиши мумкинлигини маълум қилганди.