Андижон вилоятининг Асака туманида қалбаки 100 миллион сўм пулни 57 миллион сўмга сотишга уринган шахслар қўлга олинди, деб хабар беради Бош прокуратура ҳузуридаги департамент.
Маълум қилинишича, департамент ҳамда ДХХнинг Андижон вилояти бошқармалари томонидан тезкор тадбир ўтказилган. Тадбир давомида А.А., Х.Р. исмли шахслар ва бошқалар қалбаки банкноталарни муомалага киритиш мақсадида олдиндан тил бириктириб, фуқаролар А.К. ва Х.Н.га 2000 дона қалбаки 50 минг сўмлик купюраларни 57 миллион сўмга сотган вақтида ашёвий далиллар билан ушланган.
Мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкент вилоятида олган қарзи ўрнига қалбаки 3,2 минг доллар берган шахс ушлангани, Тошкент вилоятида қалбаки 100 минг сўмлик купюраларни тайёрлаш билан шуғулланган оила аниқлангани, Тошкент вилоятида 10 минг долларни ноқонуний сотишга уринган шахслар ушлангани тўғрисида хабар берилганди.
Изоҳ (0)