Сурхондарё вилояти Денов туманида ноқонуний ҳужра фаолиятига чек қўйилди. Бу ҳақда Ички ишлар вазирлиги хабар қилди.
Қайд этилишича, 2 январь куни вилоят ИИБ терроризм ва экстремизмга қарши курашиш бошқармаси, Денов тумани ИИБ Терроризм ва экстремизмга қарши курашиш бўлими ҳамда Давлат хавфсизлик хизмати Денов шаҳар бўлими ходимлари томонидан ҳамкорликда тезкор тадбирлар ўтказилган. Тадбир давомида Денов шаҳрида яшовчи Э.С. яшаш хонадонида 2021 йилнинг январь ойидан бошлаб ҳужра ташкил қилгани аниқланган. У диний адабиётлардан фойдаланган ҳолда, вилоятнинг турли туманларида яшовчи мактаб ёшидаги вояга етмаган болаларга ноқонуний диний таълим бериб келган.
Фуқародан диний адабиётлар холислар иштирокида тегишли тартибда ҳужжатлаштирилиб олинган.
Ҳолат юзасидан Э.С.га нисбатан тўпланган ҳужжатлар Маъмурий жавобгарлик тўғрисидаги кодекснинг 241-моддасига (диний таълимотдан сабоқ бериш тартибини бузиш) асосан маъмурий баённома расмийлаштирилган. Фуқаронинг оилавий шароити ҳисобга олиниб, энг кам ойлик иш ҳақининг 10 баробари, яъни 2 миллион 700 минг сўм миқдорида жарима жазоси тайинланган.
Изоҳ (0)