Қозоғистон президентининг фармони билан Коррупцияга қарши кураш агентлигининг собиқ раҳбари Марат Ахметжанов республика ички ишлар вазири этиб тайинланди. Бу ҳақда давлат раҳбарининг матбуот хизматига таяниб, «Интерфакс» хабар берди.
«Ахметжанов Марат Муратович Қозоғистон Республикаси Коррупцияга қарши кураш агентлиги раиси лавозимидан озод этилиб, Қозоғистон Республикаси ички ишлар вазири этиб тайинлансин», — дейилади фармонда. 25 февраль куни республика ички ишлар вазири лавозимида ишлаб келган Ерлан Турғунбоев вазифасидан озод қилиниб, президент маслаҳатчиси этиб тайинланган. 59 ёшли Турғунбоев 2019 йилнинг февралидан бери Қозоғистон ички ишлар вазири лавозимида ишлаб келаётган эди.
Ахметжанов эса Коррупцияга қарши кураш агентлигини 2021 йилнинг баҳоридан буён бошқариб келарди. 2016—2021 йилларда у Республика Бош прокурорининг ўринбосари бўлган. Шунингдек, Тўқаев Асет Исекешевни президент ёрдамчиси этиб тайинлади. У аввал президент ёрдамчиси — Хавфсизлик кенгаши котиби лавозимида ишларди.
Эндиликда унинг ўрнини Бош прокурор лавозимида ишлаб келаётган Гизат Нурдаулетов эгаллади.
Бундан ташқари Қосим-Жўмарт Тўқаев Болат Тлеповни Президент Администрацияси ички сиёсат бўлими мудири этиб тайинлади. Аввал Тлепов Ахборот ва ижтимоий ривожланиш вазири ўринбосари лавозимида ишлаб келган.
Аввалроқ Тўқаев Олмаота ҳокимини лавозимидан бўшатган эди.
Мавзуга доир:
Изоҳ (0)